माओवादीया राष्ट्रिय कार्यकर्ता प्रशिक्षण थनिंनिसें न्ह्यात
एकीकृत नेकपा (माओवादी)या राष्ट्रिय कार्यकर्ता प्रशिक्षण बुधव:निसें न्ह्याःगु दु । ख्वपया खरिपाटीस च्वंगु नेपाल विद्युत प्राधिकरणया तालिम केन्द्रय् बुधवा: झिंस्वंगू राज्य समितिया सेक्रेटरीं रिपोर्टिङ याःगु दु । रिपोर्टिङ क्वचायेवं कन्हय् पार्टी नायः पुष्पकमल दाहाल 'प्रचण्ड' लगायतया नेतातय्सं प्रशिक्षण बियादीगु ज्याझ्वः दु ।
संविधान निर्माण व शान्ति प्रकृयायात निष्कर्षय् थ्यंकेगु कुतःलिसे राष्ट्रिय स्वाधीनता व नागरीक सर्वोच्चताया आन्दोलनयात सशक्त दयेकेगु विषयस नेतातय्सं प्रशिक्षण बिइगु जानकारी ब्युगु दु । पार्टी नायः प्रचण्डं उलेज्या यानादीगु प्रशिक्षणय् राज्य समिति स्तरया पीन्यासः स्वयां आपालं कार्यकर्तातय्गु ब्वति दुगु जानकारी माओवादीं ब्युगु दु ।
माघ २१ गते क्वचाःगु स्थायी समितिया बैठकं काःगु कार्यनीतिया बारे कार्यकर्तात दथुइ थुइकेगु ज्याय् एकरुपता हयेत व गाँ-गाँतक पार्टीया ज्याझ्वःयात विस्तार यायेगु निंतिं प्रशिक्षणया ग्वसाःग्वःगु खँ माओवादी पोलिटव्युरो दुजः अग्नीप्रसाद सापकोटा 'कन्चनं' कनादिल ।
प्रशिक्षण न्ह्याये न्ह्यः हे खरिपाटीइ हे च्वंगु माओवादी केन्द्रीय समिति बैठकं केन्द्रीय पदाधिकारीतय् म्हिगःया बैठकं राष्ट्रिय कार्यकर्ता प्रशिक्षणय् न्ह्यब्वयेत तयार याःगु प्रस्ताव पारित याःगु खः ।
