कांग्रेसया ज्याकूथीइ तोडफोड, सिहंयात हातपात
नेपाली कांग्रेसया एकीकरण लिपाः जिल्ला स्तरय् दुगु विवाद झन अप्वयावःगु दु । जिल्ला स्तरया विवादया कारणं हे बुधवाः कांग्रेसया कार्यकर्तातय्सं पार्टीया मू ज्याकू सानेपाय् तोडफोड यायेगु नापं पार्टी उपसभापति प्रकाशमान सिंहयात हातपात याःगु दु ।
बुधवाः पार्टी केन्द्रीय पदाधिकारीतय् बैठक जुयाच्वंगु इलय् ओखलढुंगा व संखुवासभाया असन्तुष्ट कार्यकर्तातय्सं ज्याकू न्ह्यने विरोध प्रदर्शन नापं ज्याकू तोडफोड याःगु खः । उमिसं ज्याकू दुनेया प्यंगू मेच तोडफोड याःगु दु ।
अथेहे असन्तुष्ट कार्यकर्तातय्सं उपसभापति सिंहया हातपात याःगु दु । छुं ई न्ह्यः जिल्लाया विवाद समाधान यायेत उपसभापति सिंहया संयोजकत्वय् गठित समितिं थीथी जिल्लाय् अन्यायपूर्ण रुपं हस्तक्षेप यानाः मनोमानी ढंगं जिल्ला सभापति नियुक्त याःगु व जिल्ला विवाद समाधान यायेगु नांमय् थःपिंत अन्याय याःगु धासें कार्यकर्तातय्सं सिंहयात हातपात याःगु खः ।
हातपात यायेगु झ्वलय् सिंहया सुरक्षाया निंतिं वःपिं प्रहरी नाप जूगु ल्वापूइ ओखलढुंगाया मोहन घिमिरे, टेकराज कटवा व संखुवासभाया रामकुमार थापा घाःपाः जूगु दु । घाःपाः जूपिंत वासः याकेत सानेपाय् च्वंगु स्टार अस्पालतय् यंकूगु दु ।
मंगलवाः निसें शुरु जूगु केन्द्रीय पदाधिकारीया बैठकय् आः पार्टी दुने दुगु थीथी विवाद समाधान यायेधुंकाः जक महाधिवेशनया न्हूगु मिति क्वःछिगु जूगु दु ।
