बिचाःया कथं सरकारं ज्या यायेमफु : खनाल
नेकपा (एमाले)या अध्यक्ष झलनाथ खनालं सरकारं बिचाःया कथं ज्या यायेमफुगु खँ धयादीगु दु । बुधवाः निसें शुरु जूगु एमालेया केन्द्रीय समितिया बैठकय् थःगु राजनीतिक प्रतिवेदन पेश यानादिसें अध्यक्ष खनालं थंज्याःगु खँ न्ह्यब्वयादीगु खः ।
वयेकलं प्रतिवेदन पेश यानादिसें सरकारयात जनताया भावना कथं ज्या यायेगु निंतिं गम्भीर जुया ज्या यायेत नं सुझाव बियातःगु दु । नापं प्रतिवेदनय् वयेकलं इलय् हे संविधान निर्माणया निंतिं राष्ट्रिय सहमति आवश्य जूगु खँय् नं बः बियातःगु दु ।
पार्टी मू ज्याकू बल्खुइ च्वंगु बैठकय् सहलहया निंतिं अध्यक्ष झलनाथ खनालया राजनीतिक प्रतिवेदन, महासचिव इश्वर पोखरेलया सांगठनिक प्रतिवेदन व युथफोर्सया नियमावली केन्द्रीय सल्लाहकार परिषद् नीस्वनेगु लिसे झिंप्यंगू एजेण्डा पारित याःगु दु ।
बुधवाः बैठकय् अध्यक्ष खनाल व महासचिव इश्वर पोखरेलं थःथःगु प्रतिवेदन पेश याःगु खःसा थुकीया बारे अध्ययन यायेत बिहीवाः तकया निंतिं बैठक स्थगित याःगु दु । बिहीवाः सुथय् च्वनीगु बैठकय् खनालया राजनीतिक प्रतिवेदनय् सहलह जुइगु ज्याझ्वः दु ।
