कन्हय् जनजातितय्सं आन्दोलन घोषणा याइगु

येँ (सन्ध्या टाइम्स)/नेपाःया आदिवासी जनजातितय् थीथी पुचःत जानाः दयेकूगु आदिवासी जनजाति वृहत्त संयुक्त मोर्चां कन्हय् छगू पत्रकार सम्मेलन यासें आन्दोलनया ज्याझ्वः घोषणा याइगु जूगु दु। म्हिगः केन्द्रीय भेला क्वचायेकाः थौं उगु मोर्चाया अध्यक्ष मण्डलया मुँज्या च्वनेत्यंगु दु। संविधानसभाया राज्य पुनरर्संरचना नापं राज्य शक्ति बाँडफाँड समितिं तयार याःगु झिंप्यंगू प्रदेशया अवधारणा निसें आदिवासी जनजातिया हक अधिकारया निंतिं जुयाच्वंगु कुतः व यायेमाःगु आन्दोलनया विषयसं ब्यापक सहलह जूगु उगु केन्द्रीय भेलाय् ब्वति कयादीपिंसं तयादीगु सुझावयात ध्यानय् तयाः थौंया अध्यक्ष मण्डलया मुँज्यां मूर्त रुप बियाः आन्दोलनया ज्याझ्वः तयार याइ अनं लिपा थौं हे आन्दोलनया ज्याझ्वः घोषणा यायेगु खँ उगु मोर्चाया छ्याञ्जे कुमार योञ्जनं 'सन्ध्या टाइम्स'यात कनादीगु दु। उगु वृहत्त मोर्चां आत्मनिर्णय नापं जातीय स्वायत्तता व स्वशासन संविधानय् सुनिश्चित यायेगु नितिं सशक्त कथंया आन्दोलन यायेगु जुइ धकाः नं वय्कलं जानकारी बियादीगु दु। आदिवासी जनजाति वृहत्त मोर्चाय् नेवाः स्वायत्त राज्य मंकाः संघर्ष समिति, तामाङतय्गु मंकाः संघर्ष समिति नापं खुगू जनजातिया मंकाः मोर्चा दुथ्यानाच्वंगु दु ।