नेपालभाषाय् त्रिपिटक अनुवाद

यल (सन्ध्या टाइम्स)/बुद्ध धर्मया आधारग्रन्थ त्रिपिटकयात नेपालभाषां अनुवाद यायेगु ज्या शुरु जूगु दु। थुकियात छगू परियोजनाया हे रुप बियाः ज्या न्ह्याकाच्वंगु दु। नांजाःम्ह बौद्ध विद्वान दुण्डबहादुर बज्राचार्यया अग्रसरताय् थ्व परियोजना न्ह्यानाच्वंगु खः ।

त्रिपिटकय् सुत्तपिटक, विनयपिटकव अभिधम्मपिटक यानाः स्वंगू मू ब्व दु। उकी मध्ये सुत्तपिटक अन्तर्गत लाःगु करिब फुक्क हे ग्रन्थ नेपालभाषां अनुवाद जुइधुंकूगु दुसा बाँकी निगू पिटकया छुं छुं ब्व जक अनुवाद जुइधुंकल। सुत्तपिटक दुने नं मेगु न्यागू शास्त्र दुथ्याः। थ्व पिटकयात उपदेश रुप वा व्यवहार देशनाया ज्ञानमय शास्त्रया रुपय् कयातःगु दु।
थ्व अनुवाद ज्यायात न्ह्यज्याकेगु लागिं थौंकन्हय् यलया वीरपूर्ण पुस्तक संग्रहालयपाखें विशेष रुपं पहल कयाः ज्या न्ह्याकाच्वंगु दु। आःयात त्रिपिटकया फुक्कं सफू अनुवाद यानाः ई-सफूया रुपय् निं पिकायेगु व लिपा उकियात सफूया रुपय् नं पिकया यंकेगु ग्वसाः जुयाच्वंगु खँ धाःगु दु। थ्व सफूत मूल पाली भासं नेवाः भाषाय् हयेगु ज्या जुयाच्वंगु खः।
त्रिपिटकया फुक्कं सफूत नेपालभाषाय् अनुवाद जुइधुंकल कि थुकिं नेपालभाषा वाङ्मय अझ च्वन्ह्याइगु खँ धाःगु दु। त्रिपिटक विश्वया छुं छुं सम्पन्न भाषाय् जक अनुवाद जुइधुंकूगु दु ।