सहकारी अनुगमनया ज्या जारी
स्वनिगलं पिने नं न्ह्याकीगु
येँ (सन्ध्या टाइम्स)/सहकारी संस्थापाखें नं छेँ-बुँ थेंजाःगु अनुत्पादक क्षेत्रय् लगानी यायेगु ज्या अप्वया वनाच्वंगु व उकिया अनुगमन यायेत नेपाल राष्ट्र बैंकं याःगु इनाप कथं सहकारी विभागपाखें यानाच्वंगु अनुगमन प्रक्रिया न्ह्यानाच्वंगु जानकारी सहकारी विभागं बिउगु दु ।
राष्ट्र बैंकया इनाप कथं विभागपाखें वंगु बाःछि न्ह्यवनिसें न्ह्याकूगु थुगु प्रक्रिया अझं न्ह्यानाच्वंगु जानकारी बिउगु दु। राष्ट्र बैंया निर्देशन कथं विभागं न्ह्याकूगु थुगु अनुगमनय् सहकारीपाखें छेँ-बुँ थेंजाःगु अनुत्पादक क्षेत्रय् यानाच्वंगु लगानीया बारे जानकारी कायेगु ज्या जुयाच्वंगु विभागं न्ह्यथंगु दु ।
सहकारी विभाग स्रोतया कथं सहकारी संस्थां जक दँय् छगू अर्बं मल्याक लगानी यानाच्वंगु खनेदुगुलिं अनुगमनया ज्या न्ह्यानाच्वंगु न्ह्यथंगु दु ।
विशेष यानाः शहरी लागाया सहकारी संस्थातसें थुगु क्षेत्रय् अप्वः लगानी यानाच्वंगु धासें आःतक छु छु सहकारीया अनुगमन जुल व गुगु कथं थ्व प्रक्रिया न्ह्यानाच्वंगु दु धइगु बारे जानकारी बीमछिंगु विभागया छम्ह अधिकृतं जानकारी बिउगु दु ।
स्रोत व साधनया म्हो जूसां आवंलि थ्व अनुगमन प्रक्रिया नियमित रुपं जुयाच्वनीगु धासें उम्ह अधिकृतं आःयात थ्व अनुगमन प्रक्रिया स्वनिगः दुने जक जुयाच्वंगु खःसां लिपा वनाः स्वनिगः पिने नं थज्याःगु अनुगमन प्रक्रिया न्ह्याकेगु नं जानकारी बिउगु दु ।
थौंकन्हय् झिंन्याद्वः स्वयां अप्वः सहकारी संस्थात सहकारी विभागय् दर्ता जुयाच्वंगु नं जानकारी बिउगु दु ।
