रक्सौल-अम्लेखगंज पेट्रोल पाइप लाइन स्वीकृत
गभर्नर नियुक्त यायेमफुत
सरकारं रक्सौल-अम्लेखगंज पेट्रोल पाइप लाइन दयेकेत स्वीकृति ब्यूगु दु । बुधवाः च्वंगु मन्त्रीपरिषदया बैठकं उगु स्वीकृति ब्यूगु खः ।
अथेहे नेपाल खाद्य संस्थानया अध्यक्षय् सदभावना पार्टीया सहमहामन्त्री विश्वनाथ राजवंशीयात नियुक्ति याःगु दुसाः परराष्ट्र मामिला अध्ययन प्रतिष्ठानया कार्यकारी निर्देशकय् विश्व सम्बन्ध परिषदया अध्यक्ष टीकाजंग थापायात नियुक्त याःगु दु । सूचना अध्ययन केन्द्रया कार्यकारी निर्देशकय् अनुप बास्कोटाया नियुक्त या:गु दु ।
बुधवाःया बैठकं खाली जुयाच्वंगु गभर्नरया पदय् नियुक्ति यायेगु धाःसां प्रस्तावित गभर्नरया नांमय् सहमति मजुइवं नियुक्ति यायेमफुत । अर्थमन्त्रीया संयोजकत्वय् गठन जूगु समितिं गभर्नरया निंतिं राष्ट्रिय योजना आयोगया उपाध्यक्ष युवराज खतिवडा, राष्ट्र बैंकया डेपुटी गभर्नर वीरविक्रम रायमाझी व अर्थ सचिव रामेश्वर खनाल स्वम्हेसिया नां मन्त्रीपरिषदया बैठकय् प्रस्ताव याःगु खसां उकी मध्ये छम्हेसिया नांमय् सहमति जुइमफेवं बुधवाः नं गभर्नर नियुक्ति जुइमफुत ।
अथेहे सरकारं रुग्ण सार्बजनिक संस्थान खारेज याइगु जूगु दु । मन्त्रिपरिषदया बैठकं सरकारया त्यासा: व शेयर दुगु तर थौंकन्हय् न्ह्यानामच्वंगु संस्थानत खारेज यायेगु निर्णय याःगु खः । बैठकं सामुदायिक कुतः ज्याज्वःया निंतिं जापानं ब्यूगु न्हय्च्यागू करोड न्हय्गू लाख तका ग्वाहालि स्वीकृत याःगु दु ।
बैठकं वइगु अक्टोबर ४ तारिख निसें ८ तारिखतक जुइगु प्रधानसेनापति छत्रमानसिंह गुरुङया बेलायत भ्रमणयात अनुमोदन यासें नेपाली सेनाया सहायकरथी कुमार बुढाथोकीयात उपरथीइ बढुवा याःगु दु ।
