कांग्रेसय् महाधिवेशनया मिति क्वःछीगु बारे विवाद
वइगु फागुनया लिप्पांगु वालय् पार्टीया महाधिवेशन याये धकाः क्वःछीनातःगु मिति लिछ्यायेवं न्हूगु मिति तय यायेगु बारे नेपाली कांग्रेस दुने विवाद ब्वलंगु दु ।
मंगलवाः च्वंगु कांग्रेसया केन्द्रीय कार्यसमितिया बैठकय् नेतात दथुइ पार्टीया महाधिवेशन जेठ १४ दुने यायेगु व लिपाः यायेगु बारे विवाद जूगु दु । बैठक न्ह्यायेवं छुं नेतातय्सं पार्टीया महाधिवेशन न्हूगु संविधान जारी जुइधुंकाः जेठ १४ लिपाः जक यायेमाःगु प्रस्ताव यायेवं अर्जुननरिसंह केसी, नरहरि आचार्य, पूर्णबहादुर खड्का लगायत नेतातय्सं उकीय विरोध याःगु खः ।
जेठ १४ स्वयां न्ह्यः पार्टीया महाधिवेशन यायेमाःगु पक्षय् दुपिं नेतातय्सं न्हूगु संविधान जारी जुइ न्ह्यः हे पार्टीया नेतृत्व न्हूगु पुस्तां यायेमाःगु बिचाः तःगु खः । केन्द्रीय नेतात दथुइ महाधिवेशनया मितिया बिवाद ज्यंकाः न्हूगु मिति क्वःछित बुधवाः हानं केन्द्रीय कार्यसमितिया बैठक च्वनीगु जूगु दु ।
