इलय् हे संविधान निर्माण यायेत नागरिक जागरण र्याली
न्हूगु संविधान जारी यायेत सछिन्हू जक ल्यं दुगु स्मरण यासें लोकतन्त्र व शान्तिया निंतिं नागरिक आन्दोलनं मंगलवाः नागरिक जागरण र्याली पिथंगु दु । आन्दोलनं विस्तृत शान्ति सम्झोता पालना यायेमाःगु, राजनीतिक गतिरोध अन्त्यया समाधान सतक मखु सदनय् मालेमाःगु लगायतया नं माग याःगु दु ।
नागरिक आन्दोलनं मंगलवाः स्वनिगःया न्यागू थासं र्याली पिंथंगु खः । येँया गोंगबु, कलंकी, गौसाला, चाबही व यलया मंगलबजाः नं न्हिनय् छताः इलय् पिहांवःगु र्याली प्यताः इलय् रत्नपार्कया शान्ति वातिकाय् थ्यंकाः नागरिक सभा ह्यूगु खः ।
नागरिक सभाय् न्ववानादिसें नागरिक आन्दोलनया न्ह्यलुवात डा. देवेन्द्रराज पाण्डे, कृष्ण पहाडी, श्याम श्रेष्ठ, डा. सुन्दरमणी दिक्षित व रेणु राजभण्डारीं संविधान निर्माण यायेत सछिन्हू जक ल्यं दनिसां राजनीतिक दलत गम्भीर व इमान्दार जुया लगेजुसाः संविधान जारी यायेफइगु धयादिल ।
