गतिरोध अन्त्य यायेत संयन्त्र असफल : खनाल
नेकपा (एमाले)या अध्यक्ष नापं उच्चस्तरीय राजनीतिक संयन्त्रया दुजः झलनाथ खनालं वर्तमान राजनीतिक गतिरोध अन्त्य यायेगु निंतिं संयन्त्र असफल जूगु खँ धयादीगु दु । वयेकलं उच्चस्तरीय राजनीतिक संयन्त्र राष्ट्रिय सहमतिया साथ न्ह्या: वनेत व संविधान निर्माणया निंतिं दलत दथुइया असमझदारी चीकेत असफल जूगु धयादिल ।
प्रेस चौतारीं मंगलवाः ग्वसाःग्वःगु पत्रकार नापलायेगु ज्याझ्वलय् न्ववानादिसें एमाले अध्यक्ष खनालं थः पार्टीया निर्णय कथं राजनीतिक संयन्त्रया दुजः जुयादीगु धयादिल । वयेकलं धयादिल, 'राजनीतिक संयन्त्रय् वने न्ह्यः पार्टीपाखें निर्णय मजूगु धापू पार्टीया मखु, कमरेड ओलीया खः ।'
छुं दिं न्ह्यः जक एमालेया वरिष्ठ नेता केपी शर्मा ओलीं अध्यक्ष खनाल पार्टीया निर्णय बिना हे संयन्त्रया दुजः जूगु दाबी यानादीगु खः ।
अथेहे ज्याझ्वलय् वयेकलं एमालें संविधानसभाया इलय् पितब्यूगु राजीनितक घोषणापत्रय् न्ह्यथनातः कथं संविधानया शासकीय स्वरुपय् आलंकारिक राष्ट्रपति व जनतापाखें प्रत्यक्ष निर्वाचित प्रधानमन्त्री हे पार्टीया आधिकारिक धारणा जूगु स्पष्ट यानादिल ।
