नेपाः व भारत दथुइ प्यंगू सम्झौताय् ल्हाःचिं
राष्ट्रपति यादव पाखें भारतीय राष्ट्रपति व प्रम नापलात
राष्ट्रपति डा. रामवरण यादवया भारत भ्रमणया झ्वलय् नेपाः व भारत दथुइ प्यंगू थीथी सम्झौताय् ल्हाःचिं त्येगु ज्याः जूगु दु ।
मंगलवाः जूगु छगू ज्याझ्वःया दथुइ नेपाः व भारत दथुइ मन्त्रीस्तरीय हवाई सेवा सम्झौता, नेपाःया न्यागू सीमा तक भारतीय रेल थ्यंकेगु, हेटौंडाय् पोलिटेक्निक इन्स्टिच्युट दयेकेगु व वीरगंजय् नेपाः-भारत मैत्री भवन निर्माण यायेगु सम्भौता जूगु दु । सम्झौताय् नेपाःया पाखें पर्यटनमन्त्री शरदिसंह भण्डारी व भारतया पाखें विदेशमन्त्री एसएम कृष्णां ल्हाःचिं तयादीगु खः ।
थ्वहे दथुइ नेपा: व भारतया सीमाक्षेत्रया रेलसेवा विस्तार यायेत भारत सरकारं करिब १० अर्ब ८८ करोड दां तका अनुदान ग्वाहालि बीगु सहमति जूगु दु । सहमति कथं जोगवनी निसें विराटनगर, रुपैडिया निसें नेपालगञ्ज, न्यूजलपाइगुडी निसें काँकडभिट्टा, नौतनवा निसें भैरहवा व जयनगर बिजलपुरा निसें बर्दिवास तक रेलसेवा विस्तार जुइ ।
नापं हेटौंडाय् निर्माण याइगु पोलिटेक्निक इन्स्टिच्यूटया निंतिं भारतं करिब ३५ करोड दां तका ग्वाहलि याइगु सहमति जूगु दु । राष्ट्रपति यादव व भारतया प्रधानमन्त्री सिंहया उपस्थितिमा उगु सम्झौतामा ल्हा:चिं त:गु ख: ।
मंगलवा: हे राष्ट्रपति यादवं भारतीय राष्ट्रपति प्रतिभा पाटिल व प्रधानमनत्री मनमोहन सिंह नाप खँल्हाबंला यानादीगु दु । उगु इलय् राष्ट्रपति यादवया सम्मानय् नीछगू तोप सलामी नं ब्यूगु खः ।
अथेहे राष्ट्रपति यादवं भारतीय विदेशमन्त्री एसएम कृष्णा, विदेश सचिव निरुपमा राव, विपक्षी भारतीय जनता पार्टीया नेता लालकृष्ण आडवाणी, जनता दल युनाईटेडया अध्यक्ष शरद यादव व सत्तारुढ नेशनलिस्ट कंग्रेस पार्टीया महासचिव डीपी त्रिपाठी नं नापलानादीगु दु ।
मंगलवाः हे राष्ट्रपति यादव गान्धी समाधीस्थल राजघाट झायादीगु दु । वयेकलं महात्मा गान्धीया समाधिस्थलय् श्रद्धाञ्जलि अर्पण यानादीगु खः ।
