न्हापां राजनीतिक गतिरोध अन्त्य लाकि सेना समायोजन ?

येँ (सन्ध्या टाइम्स)/तसकं तरल राजनीतिक अवस्था जुयाच्वंगु नेपाःया राजनीतिइ लिपांगु इलय् वयाः न्हापां राजनीतिक गतिरोध अन्त्य यायेगु ला कि सेना समायोजन यायेगु धइगु विषय बहसय् वःगु दु। विशेष यानाः वर्तमान सरकारया नेतृत्व यानाच्वनादीम्ह नेकपा (एमाले)या नेता प्रधानमन्त्री माधव कुमार नेपाल व प्रमुख प्रतिपक्ष एनेकपा (माओवादी)या दथुइ विवाद ब्वलंगु दु ।

एनेकपा (माओवादी) देशय् राजनीतिक गतिरोध दुगु हुनिं राजनीतिक गतिरोधया अन्त्यया निंतिं धकाः नेपाली कांग्रेसया सभापति गिरिजाप्रसाद कोइरालाया नेतृत्वय् दयेकूगु उच्चस्तरीय राजनीतिक संयन्त्रं न्हापां राजनीतिक गतिरोध अन्त्य यायेमाःगु अनं लिपा जक मेमेगु विषययात कयाः सहलह ब्याकेफइ धकाः अडान तःगु दुसा प्रधानमन्त्री माधवकुमार नेपालं धाःसा सेना समायोजन विशेष समितिया इनापय् आः न्हापां सेना समायोजनया ज्या यायेमाः धकाः खँ तयेवं थ्व निगू पक्षया दथुइ विवाद ब्वलंगु खः ।

प्रधानमन्त्री नेपालया नेतृत्वय् दुगु सेना समायोजन विशेष समितिइ माओवादीया प्रतिनिधितय्सं सेना समायोजनया स्वरुप नापं ल्याःया खँ उच्च स्तरीय राजनीतिक संयन्त्रय् सहलह ब्याकाः क्वःछीमाःगु अडान तः कथं उगु मुँज्यां क्वःछिना उच्च तहलय् यंकेगु भाला तकं प्रमयात ब्यूगु खः। ता ई लिपा वंगु शनिवाः जक च्वनेत ताः लाःगु उच्च स्तरीय संयन्त्रया मुँज्याय् निगुलिं पक्षं राजनीतिक गतिरोध न्हापा लाकि सेना समायोजन न्हापा धइगु खँय् थःथःगु अडान तःगु कारणं हे विवाद जुयाः मुँज्यां छुं नं खँ क्वःछी मफुत।
राजीतिक गतिरोध अन्त्य यायेगु नितिं धकाः दयेकूगु जूसां व हे विषययात कयाः संयन्त्र न्ह्याः वने मफइगु संभावना अप्वया वःगु दु। उच्च स्तरीय मुँज्याय् खँ मिले मजुइवं प्रधानमन्त्री नेपाल निराश जुयादीगु दु धकाः तकं धाःगु दु। उकिं आः उच्चस्तरीय राजनीतिक संयन्त्रया मुँज्या तकं अनिश्चित जुया बिउगु दु ।