'कांग्रेसया ६० प्रतिशत कार्यकर्ता जुजुवादी'

येँ (सन्ध्या टाइम्स)/नेपाली कांग्रेस दुने आः तक नं ६० प्रतिशत जुजुवादी कार्यकर्ता दनिगु खँ कांग्रेसया युवा नेता मार्शल जुलुस शाक्यं धयादीगु दु। 'सन्ध्या टाइम्स'लिसे खँ ल्हासें वय्कलं धयादिल, 'पार्टी दुने राज संस्था पुनर्बहाली यायेमाः धाइपिं कार्यकर्ता हे अप्वः दनि, प्रतिशतया ल्याखं धायेगु खःसा ६० प्रतिशत दइ ।'

२०४६ सालया जनआन्दोलन लिपा दयेकूगु अन्तरिम सरकारया मन्त्री तकं जुयादीम्ह कांग्रेस नेता शाक्यं कांग्रेस दुने गबलय् झिंछक्वःगु महाधिवेशन यायेगु धइगु खँय् बिवाद ब्वलनाच्वंगु खँ नं कनादिल। महाधिवेशनया मिति क्वःछीगु निंतिं थौं पार्टी केन्द्रीय कमिटीया मुँज्या च्वनीगु जूगु दु। वय्कलं देशय् न्हूगु संविधान दयेके न्ह्यः हे पार्टीया महाधिवेशन यानाः पार्टीया लाइन स्पष्ट यायेमाःगु बिचाः नं प्वंकादिल। राजसंस्था ल्यंका तयेगु ला कि मतयेगु? नेपाःयात धर्म निरपेक्ष यायेगु ला कि मयायेगु? अले नेपाःयात छुकिया आधारय् संघीय राज्यय् यंकेगु बाय् संघीय राज्ययात गुकथं कायेगु धइगु विषययात कयाः ठोस खँ क्वःछिनाः संविधान निर्माणय् थःपिनि अडान तये फइ धकाः नं कनादिल ।

नेता शाक्यं थ्व इलय् पार्टीया केन्द्रीय पदाधिकारीतय्सं जक संविधान निर्माणया ज्या क्वचायेधुंकाः महाधिवेशन यायेगु खँ हयाच्वंगु जूसां अप्वः कार्यकर्तात संविधान निर्माण याये न्ह्यः हे पार्टीया महाधिवेशन यायेमाः धइगु पक्षय् दु धयादिल। संघीयता, राजसंस्था, धर्म निरपेक्षताया सवालय् जनमत संग्रह मयासे नेतातय्सं तःधंगु विषययात कयाः नं थः मंदुथे निर्णय यानाः न्ह्याः वनाच्वंगु हुनिं हे समस्या तच्वया वयाच्वंगु दावी नं वय्कलं यानादिल। नेता शाक्यं छुं दिं लिपा हे कांग्रेसया युवा नेतातय्सं संविधान दयेके न्ह्यः हे पार्टीया माहाधिवेशन यायेमाः धकाः पार्टीयात दबाव बीगु कथं छगू मंकाः विज्ञप्ति पिकायेगु तयारी जुयाच्वंगु जानकारी नं बियादिल ।