सागय् स्वर्ण त्याकूम्ह कासामि विनिता महर्जनयात हनेज्या
येँ (सन्ध्या टाइम्स)/बंगलादेशया राजधानी ढाकाय् नकतिनि क्वचाःगु दक्षिण एशियाली खेलकुद सागय् स्वर्ण पदक त्याकादीम्ह उसु कासाया कासामि मय्जु विनिता महर्जनयात थनया अशोक विनायक ग्वाहालि पुचःपाखें हनेज्या यात ।
मरुइ नकतिनि जूगु छगू ज्याझ्वःया दथुइ मय्जु महर्जनयात ग्वाहालि पुचःपाखें १०,५०० तका दां नापं तामपत्र बियाः दोसल्लां न्ययेकाः हनेज्या याःगु खः ।
उगु हे ज्याझ्वलय् बाजं गुरु कृष्ण महर्जनयात नं ताम्रपत्र व दोसल्लां न्ययेकाः हनेज्या याःगु खः ।
अथे हे ७५ दँ पुलेधुंकूपिं ४२ म्ह ज्याथजिथिपिंत नं उगु ज्याझ्वलय् दोसल्लां न्ययेकुसें हनपौ देछाःगु खः। अथे हे ज्याझ्वलय् थुगुसी एसएलसी पास जूपिं २२ विद्यार्थी नापं समाजसेवी भाजु हर्षरत्न ताम्राकारयात नं हनेज्या याःगु खः।
ज्याझ्वलय् संविधानसभाया सभासद् तीर्थराम डंगोल मूपाहां कथं झाःगु खः। लिसें सभासद् नवीन्द्रराज जोशी, पुलांम्ह मन्त्री अष्टलक्ष्मी शाक्य लगायत चक्रमान डंगोल, ई. मोहनकृष्ण डंगोल, सुवर्णमान डंगोल व सत्यनारायण डंगोलपिंसं नं नुगःखँ प्वंकादीगु खः ।
तीर्थमान महर्जनया सभापतित्वय् जूगु उगु ज्याझ्वलय् ज्याझ्वःया संयोजक शंकर महर्जनं सुभाय् देछानादीगु खः ।
