भोताहिति मागःत्वाःया मू धिमे गुरु कान्छा मुनिकार लुमंकल
येँ (सन्ध्या टाइम्स)/येँ देय्या परम्परागत स्वीनिगू त्वाः मध्ये छगू त्वाः मागल भोताहिति त्वाःया मू धिमे गुरु कान्छा मुनिकार मदुगु झिंस्वन्हुया तिथि कुन्हु मागल भोताहिति त्वाःखलकं छगू मुँज्या यासें बिचाः हायेकल।
त्वाःनायः सिंहबहादुर मुनिकारया सभापतित्वय् जूगु उगु बिचाः मुँज्यां मदुम्हेसिया आत्मायात शान्ति कामना यासें छगू मिनेट मौनधारण यात। ने.सं. १०५३ यःमरि पुन्हि कुन्हु जन्म जूम्ह कान्छा मुनिकारं मागल भोताहिति त्वालय् २०२५ साल माघ ८ गते निसें पोंगा गुरु, २०५४ साल फागुन ९ गते निसें मू धिमे गुरु जुयाः ज्या यानादीगु खः ।
ज्याझ्वलय् न्ववासें वय्कलं त्वालय् यानादीगु योगदानयात कयाः त्वाःनायः सिंहबहादुर मुनिकार, छ्याञ्जे धर्म मुनिकार, पोंगा गुरु रामदास मुनिकार, आशाकाजी मुनिकार, जितेन्द्र मुनिकार व कायभाजु ध्रुव मुनिकारं थःथःगु नुगःखँ प्वंकादीगु खः ।
७७ दँय् मदुम्ह कान्छा मुनिकारया जहान नापं काय् छम्ह व म्ह्याय् स्वम्ह दी ।
