नियात्रा सहकारी मानवीय व सामाजिक ज्याय्
येँ (सन्ध्या टाइम्स)/ नियात्रा बचत तथा ऋण सहकारी संस्थां सामाजिक ख्यलय् नं थीथी ज्याझ्वलत याना वनेगु झ्वलय् थ्व हे वंगु फागुन १ गतेनिसें स्वलायंकंया विपश्यना ध्यान संचालन याःगु दु ।
सिद्धि मंगल विहारया भिक्षु विमलों उलेज्या यानाबिज्याःगु ज्याझ्वलय् सहकारी संस्थाका अध्यक्ष गौतमकाजी तुलाधर, सामाजिक समितिया संयोजक गायत्री श्रेष्ठ, सदस्य कल्पना मानन्धर लगायतयापिंसं थःथःगु नुगः खँ प्वंकादीगु खः।
ध्यान शिविरय् सहकारी संस्थाया स्वीन्याम्ह दुजःपिंसं ब्वति कयाच्वंगु दु। संस्थाया अध्यक्ष तुलाधरंथुगु ध्यान शिविरय् न्हूगु आयाम तनाः संचालन यायेगु योजना दुगु नं जानकारी बियादीगु दु ।
अथेहे संस्थाया दुजःपिंत मानवीय ग्वाहालि यायेगु तातुनाः आकस्मिक ग्वाहालि बीगु खँ थुगु समितिया संयोजक कल्याण खाती जानकारी बियादीगु दु। थुगु समितिपाखें संस्थाया दुजःपिंत दुघर्टना, विरामी जुयाः आवश्यक जुल धाःसा न्यय्द्वः तका आर्थिक ग्वाहालि वा आकस्मिक रुपं मृत्यु जुल धाःसा मानवीय व आर्थिक ग्वाहालि यायेगु घटना जूगु थासं अस्पताल तक यंकेगु, छेँजःपिंत सुचं बीगु जानकारी नं बिउगु दु ।
थुगु ज्याया निंतिं सहकारी संस्थां सवारी साधन सहित स्वम्हेसित नीप्यघौ हे खटे यानातःगु दुसा थुगु सुविधा आः निंतिं स्वनिगःया झिंन्यागू किलोमीटर लागा दुने जक बीगु नं संस्थां न्ह्यथंगु दु ।
