शंखधरया नामं विमानस्थलया नां

त्रिभुवन अन्तर्राष्ट्रिय विमानस्थलया नां हिलाः आः राष्ट्रिय विभूति शंखधर साख्वाः अन्तर्राष्ट्रिय विमानस्थल तयेगु धकाः प्रस्ताव वःगु दु । सरकारं उकिया लागिं पहल शुरु याःगु दुसा नकतिनि हे जक उड्डयन प्राधिकरणं नं नां हिलेगु प्रस्ताव पारित याःगु समाचार वःगु दु । आः थ्व प्रस्ताव मन्त्रिपरिषदं पारित यात धाःसा थ्व नां जू वनीगु निश्चित दु ।

सरकारया थ्व ज्यायात च्वछाये हे माः । खतुं सरकारं माःगु ज्या त्वःताः न्हापा दुगु थाय्या नां हिलेगु ज्या निं याः वनाच्वन धकाः आलोचना याईपं मनूत नं मदइगु मखु । तर थज्याःगु ज्यायात अथे जक धकाः विरोध यायेगु धाःसा पाय्छिमखु । देशय् वःगु गणतन्त्रयात छसिकथं धिसिलाका यंकेगु खःसा थुकथंया ज्याझ्वः यायेमाःगु अतिकं आवश्यक दु । मखु धइगु खःसा थ्व सरकार व न्हापाया सरकार दथुइ छु पात धइगु न्ह्यसः पिदनी । उकिसनं शंखधर साख्वालं नीस्वनाथकूगु नेपाल संवत्यात सरकारं थुगुसी औपचारिक रुपं हे राष्ट्रिय संवत् धकाः घोषणा यायेधुंकूगु दुसा स्वयम् शंखधर साख्वाःयात न्हापा हे सरकारं राष्ट्रिय विभूति घोषणा याना तयेधुंकूगु दु । थज्याःगु अवस्थाय् शंखधरयात सरकारं आम रुपं यायेगु सम्मान धइगु थथे हे देय्या विशिष्ट थाय्या नामाकरण यायेगु खः । थुकियात नेपाल संवत्या आन्दोलनकारीतय्सं जक मखु नेपाल संवतं नेपाःया राष्ट्रिय म्हसीका बी धइगु खँय् विश्वास याईपं सकस्यां थुकियात सकारात्मक रुपं कायेमाः । थ्व जक मखु सरकारं आः मेमेगु थाय् व स्मारकया नां नं नामाकरण यानाः सम्मान याना यंकेगु ज्या यायेमाः । आः याःगु ज्यायात मूर्त रुप बीगु लागिं सरकारं याकनं माःगु ज्या सम्पन्न यायेमाः ।

More Stories Like this