प्रधानमन्त्री नेपाल व म्यानमारया परराष्ट्रमन्त्री दथुइ खँल्हाबंला
प्यन्हूया निंतिं नेपा:या औपचारिक भ्रमणय् झयादिम्ह म्यानमारया परराष्ट्रमन्त्री न्यान विनं प्रधानमन्त्री माधवकुमार नेपालयात नापलानाः खँल्हाबंला यानादीगु दु ।
मंगलवाः सुथय् प्रधानमन्त्री निवास बालुवाटारय् जूगु खँल्हाबंलाय् प्रधानमन्त्री नेपालं निर्धारित इलय् न्हूगु संविधान जारी यायेगु हे दक्वं नेपाःमितय् हित जुइगु धयादिल । वयेकलं जेठ १४ गते दुने संविधान जारी यायेगु विषय जनआन्दोलनया म्याण्डेट जूगुलिं उकीयात पूवंकेत थः गम्भीर जुया लगेजुयाच्वनाःगु धयादिल ।
उगु इलय् म्यानमारया परराष्ट्रमन्त्री विनं प्रधानमन्त्री नेपालयात म्यानमार भ्रमण यायेत ब्वनादिल । विनं म्यानमारया प्रधानमन्त्रीया ब्वनाः प्रधानमन्त्री नेपालयात बियादीगु खः । नापं वयेकलं निगू देय् अधिकारीत दथुइ खँल्हाबंला यानाः प्रधानमन्त्री नेपालया म्यानमार भ्रमणया मिति क्व:छीगु कनादिल ।
अथेहे खँल्हाबंलाया झ्वलय् निगू देय्या पर्यटन, आर्थिक व व्यापारिक सम्बन्ध विस्तारया बारे नं सहलह जूगु खः ।
