अन्तर्राष्ट्रिय गिरोह पाखें जमिमया हत्या
संचार उद्यमी जमिम शाहया हत्या अन्तर्राष्ट्रिय आपराधीक गिरोहया संलग्नताय् जूगु दाबी प्रहरीं याःगु दु । नापं शाहया हत्याय् बब्लु धाम्ह दीपक शाही मुख्य योजनाकार जूगु दाबी नं याःगु दु ।
जमिम हत्याया प्रतिवेदन सार्वजनिक यायेत सोमवाः छगू पत्रकार सम्मेलन यानाः अन्तर्राष्ट्रिय आपराधीक गिरोहया संलग्नताय् शाहीं हत्याया योजना दयेकूगु दाबी याःगु दु । प्रहरीं अनुसन्धानया थीथी विधि व टेलिफोन संवादया विश्लेषणया आधारय् थःगु प्रतिवेदन तयार यानाःगु खँ धाःगु दु ।
अथेहे पत्रकार सम्मेलनय् प्रहरीं हत्याय् संलग्न जूपिनि नां नं सार्वजनिक याःगु दु । प्रहरीं सार्वजनिक याःगु नां मध्ये छम्ह प्रकरीलय् हे कार्यरत दुम्ह प्रकाश क्षेत्री दुसाः वयात प्रहरीं ज्वनेधुनाःगु जानकारी ब्यूगु दु । अथेहे हत्याय् नेपाली नागरिक श्रीकृष्ण पोडेल, राजु लामा, किशोर खड्का नापं भारतीय नागरिक रक्की गुड्डु साह, बाबु नांया मेम्ह भारतीय नागरिक व मेम्ह छम्ह नं दुगु खँ धाःगु दु । नापं प्रहरीं छम्ह आपराधी हत्याय् संलग्न जूगु धकाः भिडियो टेप सार्वजनिक या:सां परिचय धाःसा गोप्य तःगु दु ।
प्रहरीं हत्याय् अन्तर्राष्ट्रिय आपराधीक पुचः छोटा राजया संलग्नता दुगु दाबी याःगु दु । भारतया लखनऊ जेलय् दुम्ह उगु पुचःया बब्लु श्रीवास्तव नं जमिम हत्याय् संलग्न जूगु खँ प्रहरीं धाःगु दु । अथेहे हत्याय् छोटा राजन पुचःया भरत नेपाली नांया मनूया संलग्नता दुगु खँ धाःगु दु ।
वंगु माघ २४ गते न्हिनय् हे स्पेसटाइम नेटवर्कया अध्यक्ष जमिम शाहयात लाजिम्पाटया मू सतकय् गालीं क्येकाः स्याःगु खः । उगु घटनाया छानबिन यायेत प्रहरीं डीआइजी राजेन्द्र भण्डारीया संयोजकत्वय् अनुसन्धान कार्यदल गठन याःगु खः ।
