'सरकारं फोहरमैला व्यवस्थापन सम्बन्धी न्हूगु कानुन हयेत्यंगु दु'
स्थानीय विकास मन्त्रालयया छ्याञ्जे कृष्ण ज्ञवालीं सरकारं फोहरमैला व्यवस्थापन सम्बन्धी न्हूगु कानुन हयेत्यंगु खँ धयादीगु दु ।
स्थानीय विकास मन्त्रालयअन्तर्गतया फोहरमैला प्रबन्ध तथा स्रोत परिचालन केन्द्र व युएन ह्याविटाटया संयुक्त ग्वसालय् थौंनिसें न्ह्यागू फोहर व्यवस्थापन सम्बन्धी तालिम ज्याझ्वया उलेज्या यानादिसें ज्ञवालीं उगु कानुन कार्यान्वयनया निंतिं नगरपालिकाया भूमिका महत्वपूर्ण जुइगु धयादिल । वय्कलं फोहरमैला व्यवस्थापनय् निजी व सरकारी साझेदारीया अवधारणा न्ह्यने हइगु धयादिसें उकिया कार्यान्वयनया निंतिं स्थानीय निकाययात जिम्मेवार जुया न्ह्यायेत इनाप यानादिल ।
भौतिक योजना तथा निर्माण मन्त्रालयया ल्यू छ्याञ्जे सुमन शर्मां फोहरमैलाया कारण सरसफाइलय् समेत समस्या जुयाच्वंगुलिं फोहरमैला व्यवस्थापन लिसलिसें सरसफाइया मुद्दायात नं छक्वलं समाधान यायेमागु धयादिल ।
युएन ह्याविटाटया प्राविधिक सल्लाहकार रोशनराज श्रेष्ठं सरकारं हगु फोहरमैला व्यवस्थापन व सरसफाइसम्बन्धी प्रत्येक ज्याझ्वलय् थ:पिंसं फक्व ग्वाहालि यायेगु प्रतिबद्धता प्वंकादिल । प्यन्हू तक जुइगु उगु तालिमय् येँ, यल, किपु, जनकपुर, इलाम, बाग्लुङ लगायतया नगरपालिकाया प्रतिनिधिपिनिगु ब्वति दु ।
