देय् दबूया किपू घोषणा
येँ (सन्ध्या टाइम्स)/नेवाःतय्गु राष्ट्रिय संगठन नेवाः देय् दबूया न्हापांगु राष्ट्रिय परिषद्या मुँज्या किपू घोषणापत्र जारी यासें क्वचाल। वंगु शुक्रवाः व शनिवाः नेवाः देय् दबूया थीथी जिल्लाया सछिम्हं मल्याक प्रतिनिधितय्सं ब्वति काःगु उगु परिषद्या मुँज्या किपूया नेपालभाषा आकादेमिइ जूगु खः।
परिषदं घोषणा याःगु किपू घोषणा पतिइ नेवाः स्वायत्त राज्य मंकाः संघर्ष समिति गठन यायेगु निंतिं देय् दबूपाखें संयोजनकारी भूमिका म्हिताः नेवाः आन्दोलनयात अझ थकायेगु ज्या जूगु नापं आः नं उकियात निरन्तरता बियाः आन्दोलनयात अझ च्वन्ह्याकेमाःगु, संविधानसभाया राज्य पुनर्संरचना समितिपाखें नेवाः प्रदेश नापं दुथ्याकाः हःगु झिंप्यंगू प्रदेशया अवधारणायात च्वछासें नेवाः प्रदेशया लागा मगाः धइगु खँय् थप दवाव बीमाःगु, नेवाः राज्यं पिने च्वंपिं नेवाःतय्गु निंतिं नेवाः बाहुल्यता दुगु लागाय् उप प्रदेश, प्रदेशया इलाका कायेगु नापं मेमेगु थासय् समानुपातिक प्रतिनिधित्वया निंतिं माःगु कथं कुतः यायेगु खँ न्ह्यथंगु दु।
नेवाः देय् दबूया परिषद्या मुँज्याय् देय् दबूया मूछ्याञ्जें न्ह्यब्वयादीगु प्रतिवेदन व दांभरीं न्ह्यब्वयादीगु प्रतिवेदन, जिल्ला संगठनया नियमावली नापं भावी कार्ययोजना तकं पारित याःगु दु ।
