नेवाः राज्यया सीमा बारे सहलह
यल (सन्ध्या टाइम्स)/ललितपुर नागरिक आन्दोलन व कवि क्याफेया मंकाः ग्वसालय् संविधानसभाय् प्रस्तुत नेवाः प्रदेश बारे सहलह मुँज्या जुल। ज्याझ्वलय् न्ववासें नेकपा (एमाले) या केन्द्रीय दुजः राजेन्द्र श्रेष्ठं संविधानसभाय् पेश जुयाच्वंगु १४ प्रदेशया नक्सायात नेवाः लगायत जनजातितय्सं समर्थन यायेमाःगु बिचाः प्वंकादिल। थुकी नेवाः लगायत थीथी जनजातिया म्हसीका दुथ्याःगु खनेदुसां संविधान सभाय् आः खने दुगु समीकरणं थ्व नक्सा पारित जुइगु सम्भावना धाःसा मदया वंगु खँ कनादिल ।
नेपाः राष्ट्रिय पार्टीया सभासद् बुद्ध साय्मिं छुं हे विश्लेषण मयासे राजधानी थनं पिने यंकेगु धकाः प्रचार याये मजिउगु बिचाः प्वंकादिल। लिसें आः प्रस्तावित १४ प्रदेशया नक्साय् नेवाः राज्यया सीमा तसकं मगाःगु खँ नं कनादिल ।
ग्वसाः खलःपाखें न्ववासें शाक्य सुरेनं नेवाः व तामाङ्ग राज्य जःलाखःला जूगुलिं सहमति दयेकाः न्ह्याः वनेमाःगु खँ कनादिल ।
