लेखा पाखें थीथी विषयस जानकारी कायेगु जारी
येँ (सन्ध्या टाइम्स)/ व्यवस्थापिका संसदया सार्वजनिक लेखा समितिं मेशिन रिडेबल पासपोर्ट सम्बन्धि भ्वं उपलब्ध यायेत परराष्ट्र मन्त्रालययात निर्देशन बिउगु दु ।
समितिया बैठकं मेशिन रिडेबल पासपोर्ट जारी यायेगु विषयस थुगु प्रक्रिया बारे सम्बन्धित भ्वं उपलब्ध यायेत उप प्रधानमन्त्री नापं परराष्ट्र मन्त्री सुजाता कोइराला व परराष्ट्र सचिव मदन भट्टराईयात बैठकय् सःताः निर्देशन बिउगु खः।
समितिं कम्प्यूटर प्रणालीपाखें जारी याइगु मेशिन रिडेबल पासपोर्टया प्रक्रियाय् अपारदर्शीता खने दुगु धासें थ्व सम्बन्धि भ्वं वइगु न्हय्न्हुया दुने समितिइ पेश यायेत नं निर्देशन बिउगु खः ।
थ्व बारे जानकारी कायेगु निंतिं सहलह ब्याकेगु झ्वलय् समितिया पदाधिकारी व परराष्ट्र मन्त्री कोइराला दथुइ छझाः कचवं ब्वलंगु खः। अथेखःसां मन्त्री कोइरालां वइगु अप्रिल १ तारिखं निसें मेशिन रिडेबल पासपोर्ट लागू यायेगु निंतिं माःगु तयारी जुयाच्वंगु जानकारी बियादीगु खः ।
थुगु पासपोर्ट ०६१ सालं हे लागू यायेगु सरकारं निर्णय याःगु खःसा मन्त्रालयं थ्व सम्बन्धि प्रक्रिया धाःसा आः वयाः जक शुरु याःगु खः। थुकिया निंतिं मन्त्रालयं आव्हान याःगु टेण्डर नियम संगत मजूगु धासे खारेज यायेवं लेखा समितिं थ्व बारे प्रक्रिया न्ह्याकूगु खः ।
थ्व हे झ्वलय् लेखां दैनिक उपभोग्य ज्वलनय् जुयाच्वंगु अनियन्त्रित बजाः भाःया लिसें हाकुबंजाः जुयाच्वंगु बारे आपूर्ति मन्त्रालययाके नं जानकारी कायेगु निर्णय याःगु दु।
समितिं थ्व बारे जानकारी कायेगु निंतिं मन्त्रालयया सचिव विभागया महाप्रबन्धकयात मेगु वालय् समितिइ सःतूगु दु।
अथेहे हुलाक सतक व आः निर्माण जुयाच्वंगु फास्ट ट्र्याक बारे नं जानकारी कायेगु निंतिं मेगु वालय् अर्थ मन्त्री सुरेन्द्र पाण्डे, उपप्रधान नापं भौतिक योजना व निर्माण मन्त्री विजय गच्छदार व रक्षा सचिवयात सःतूगु दु ।
