येँ हानं मेगू दुर्घटना, माइक्रोबसय् मि च्याकाबिल
स्वयम्भू यातायात संचालनय् रोक
आइतवाः निति स्वयम्भू यातायातया बसं ठक्कर नकाः छम्ह लँजुवाः सीगु व प्यम्ह घाःपाः जूगु घटना ख्वाँसें मच्वंगु इलय् येँ हानं सोमवाः मेगू दुर्घटना जूगु दु । सोमवाः सुथय् येँया गौरीघाटय् छगः माइक्रोबसं न्हय्दँ दुम्ह लँजुवाःयात ठक्कर नकाः घाःपाः यानाब्यूगु दु । बा. २. ख. ७१० नम्बरया मोइक्रोबसं ठक्कर नकूम्ह धादिङया ठाकुरप्रसाद अर्याल गम्भीर घाःपाः जूगु दु । घाःपाः जूम्ह अर्यालयात वासः याकेत ओम अस्पतालय् भर्ना याःगु दुसाः गौरीघाटया आक्रोशित पुचलं उगु माइक्रोबसय् मि च्यकाब्यूगु दु । माइक्रोबसया चालक धाःसाः बिस्यूवंगु दु ।
थ्वहे दथुइ प्रशासनं स्वयम्भू यातयायातया सवारी साधन संचालनय् रोक लगेयाःगु दु । चालकया लापरवाही, अपासी प्रतिस्प्रर्धा व कमिसनया लोभया कारणं सवारी साधन तीव्र गतिलय् ब्वकीगु ठहर यासें इलाका प्रहरी ज्याकू गौशालां स्वयम्भू यातायताया सवारी चले यायेत तत्कालया निंतिं रोक लगे याःगु खँ धाःगु दु ।
उखे आइतवाः स्वयम्भू यातयातं क्यलाः छम्ह स्याःगु व मेपिं प्यम्ह घाःपाः याःगु विरोधय् सोमवाः नं स्थानीयवासीतय्सं विरोध प्रदर्शन याःगु दु । दुर्घटनाया दोषीयात कारवाही व सिम्हेसिया छेँजःयात क्षतिपूर्तिया माग यासें स्थानीवसीतय्सं मित्रपार्क चाबहिल खण्डय् सोमवाः सुथय् प्रदर्शन याःगु खः ।
