एमाले नापया विवाद संवाद पाखें समाधान : देउवा
नेपाली कांग्रेसया वरिष्ठ नेता शेरबहादुर देउवां वर्तमान एमाले नेतृत्वया सरकार नाप सरकार हे क्वथले माःगु कथंया विवाद मदुगु दाबी यानादीगु दु । वयेकलं एमाले नेतृत्वया सरकार बहुमत प्राप्त सरकार जूगु व उगु सरकार नाप चीचीधंगु मतभेद जक दुगु धयादिल । नापं वयेकलं अज्याःगु मतभेद व असन्तुष्टियात संवादया पाखें समाधान यायेफइगु धयादिल ।
नेपाल प्रेस युनियन पाल्पां सोमवाः तानसेनय् याःगु पत्रकार नापलायेगु ज्याझ्वलय् न्ववानादिसें देउवां उच्चस्तरीय राजनीतिक संयन्त्रं शान्ति प्रकृया पूवंकाः न्हूगु संविधन जारी याइगु विश्वास प्वंकादिल । संयन्त्रय् स्वंगू दल जक दुथ्याःसा मेगू दलं षड्यन्त्रया कथं स्वयेफइगु सम्भावना अप्वः दुगुलिं संविधानसभाय् दुथ्याःगु दक्वं दलयात कःघानाः वनेमाःगु खँय् बः बियादिल ।
अथेहे वयेकलं आः न्हूगु सरकार गठन यायेगु स्वयां शान्ति प्रकृयायात याकनं पूर्णता बीगू व संविधान जारी यायेमाःगु खँय् दक्वं गम्भीर जुइमाःगु धयादिल । नापं वयेकलं न्हूगु संविधान जारी याये न्ह्यः माओवादी लडाकुया व्यवस्थापन व वाईसीएलया अर्धसैनिक संरचना भंग यायेमाःगु खँ बः बियादिल ।
