राष्ट्रपति यादव भारत प्रस्थान
राष्ट्रपति डा. रामवरण यादव गणतन्त्र नेपाःया न्हापांम्ह राष्ट्रपतिया कथं सोमवाः प्यन्हुन्यंकया भ्रमणया निंतिं भारत प्रस्थान यानादीगु दु । राष्ट्रपति यादव सोमवाः सुथय् ११:१५ बजे नेपाल बायुसेवा निगमया विशेष विमानं न्हू दिल्ली प्रस्थान यानादीगु खः ।
वयेकयात विमानस्थलय् उपराष्ट्रपति परमानन्द झा, प्रधानमन्त्री माधवकुमार नेपाल, संविधानसभा अध्यक्ष सुवासचन्द्र नेम्वाङ नापं मन्त्रीतय्सं विदाइ याःगु खः । उगु इलय् राष्ट्रपति यादवया सम्मानय् नेपाली सेनाया टुकडीं सलामी अर्पण याःगु खः ।
राष्ट्रपति यादव थः भारतीय समकक्षी प्रतिभा पाटिलया ब्वनाय् भारत भ्रमणय् झायादीगु खः । वयेकलं बुधवाः बहनी पाटिलयात नापलायेगु ज्याझ्वः दु । अथेहे भ्रमणया झ्वलय् राष्ट्रपति यादवं भारतीय उपराष्ट्रपति हमिद अन्सारी, भारतीय प्रधानमन्त्री मनमोहन सिंह, गृहमन्त्री पी चदाम्बरम, विदेशमन्त्री एसएम कृष्णा, अर्थमन्त्री प्रणव मुखर्जी व विदेश मन्त्री निरुपमा राव लगायतया सरकारी उच्च अधिकारीतय्त नापलानादीगु ज्याझ्वः दु ।
अथेहे वयेकलं यूपीएया अध्यक्ष सोनिया गान्धी, प्रतिपक्षी नेता सुष्मा स्वराज, भाजपाया वरिष्ठ नेता लालकृष्ण आडवाणी, समाजवादी पार्टीया अध्यक्ष मुलायम सिंह यादव, भारतीय राष्ट्रवादी कांग्रेसया महासचिव डिवी त्रिपाठी, भारतीय जनता दल संयुक्तया अध्यक्ष शरद यादव, भारतीय कम्युनिस्ट पार्टी (माक्र्सवादी)या अन्तर्राष्ट्रिय मामिला प्रमुख सीताराम यचुरी, अल इन्डिया कंग्रेस कमिटी विदेश मामिला प्रमुख करण सिंह, भारतीय कम्युनिस्ट पार्टीया महासचिव एबी बर्धन व अल इन्डिया कंग्रेस कमिटीया महासचिव जनार्दन द्विवेदी लगायतयात नं नापलानादीगु ज्याझ्व: दु ।
अथेहे राष्ट्रपति यादवया भ्रमणया झ्वलय् हवाई यातायात, रेलमार्ग, हेटौंडा पोलिटेक्निक इन्स्टिच्युट व विराटनगरय् नेपाः व भारत मैत्री सभाभवन निर्माण सम्बन्धी सम्झौताय् हस्ताक्षर जुइगु ज्याझ्वः दु ।
