स्वयम्भू यातायातं हानं मनू क्यल, छम्ह सित, प्यम्ह घाःपाः
चाबहिलया गोपीकृष्ण सिनेमा हल क्षेत्रय् स्वयम्भू यातयातया बसं आइतवाः सनिलय् ठक्कर बीयाः छम्ह मनू सिगु दुसाः प्यम्ह घाःपाः जूगु दु । ठक्करय् लाना घा:पा: जूपिं न्याम्ह लँजुवातय्त वासः यायेत अस्पताल यंकूगु खसां छम्ह अस्पतालय् वासः याकूयाकू मदुगु खः ।
स्वयम्भू यातायातया बा. २. ख. ५९३ नम्बरया बसं सनिलय् ठक्कर बियाः दोलखा जिरीया पीन्यादँया डम्बरकुमारी नेपाली सिगु दु । अथेहे खोटाङया स्वीन्यादँया तारा तामाङ, सिन्धुलीया स्वीदँया जानुका माझी, पाल्पाया स्वीनिदँया रिता बस्याल व पाल्पाया खुइनिदँया मदन श्रेष्ठ घाःपाः जूगु दु । घाःपाः जूपिं मध्ये पाल्पाया रिता बस्यालया अवस्था गम्भीर जूगु खँ धाःगु दु । बस्यालया ओम अस्पतालया आइसीयुलय् वासः जुयाच्वंगु दु ।
उखे बसं लँजुवात खनाः नं मदिकुसें ठक्कर नकूगु धासें आक्रोसित जूपिं स्थानीयबासीतय्सं चाबहिलय् प्यंगः बसय् मि च्याकाब्यूगु दु । न्यनलाथें मि च्याकेत शुरु यायेवं प्रहरीं स्थिति नियन्त्रणय् कायेत अश्रुग्याँस क्येकेमाःगु खः ।
