संविधान निर्माणया बाधक माओवादी : प्रधानमन्त्री

प्रधानमन्त्री माधवकुमार नेपालं संविधान निर्माण यायेगु ज्याय् प्रमुख बाधक माओवादी जूगु द्वपं बियादीगु दु । वयेकलं माओवादी अध्यक्ष पुष्पकमल दाहाल 'प्रचण्डं' न्ववाइगु छगू, याइगु छगू जूगुलिं निर्धारित इलय् हे संविधान जारी जुइमफइगु आशंका अप्वयावंगु धयादिल ।

प्राविधिक शिक्षा व व्यावसायिक तालिम परिषद गौर नरसिङ्ग इन्ष्टिच्यूटया आइतवाः शिल्यानास लिपाः जूगु ज्याझ्वलय् न्ववानादिसें वयेकलं प्रचण्डं न्हिया न्हिथं मेमेगू हे खँल्हाना जुइगुलिं जेठ १४ गते दुने संविधान निर्माण यायेगु ज्याय् बाधा अवरोध जुयाच्वंगु धयादिल ।

वयेकलं माओवादीया योग्य लडाकुयात सेनाय् समायोजन लिपाः जक संविधान निर्माण जुइगु धयादिल । वयेकलं सेना समायोजन व न्हूगु संविधान निर्माण यानाः देशय् शान्ति स्थापना यायेमाःगु ज्या सरकारया प्रमुख प्राथमिकता जूगु धयादिल ।