पासपोर्ट छपाइया भ्वँ पेस यायेत सरकारयात निर्देशन
संसदया सार्वजनिक लेखा समितिं मेसिन रिडेएबल पासपोर्ट (एमआरपी) छपाइ सम्बन्धय् दुगु दक्वं भ्वँत छवाः दुने पेस यायेत सरकारयात निर्देशन ब्यूगु दु ।
सिङहदारवारय् आइतवाः सुथय् च्वंगु समितिया बैठकं एमआरपी सम्बन्धि न्हापां निसें आः तकया दक्वं विवरण छवाः दुने पेस यायेत पराष्ट्रमन्त्रालय पाखें माग यायेगु निर्णय याःगु खः । थुगु भ्वँत प्राप्त जुइधुंकाः परराष्ट्रया पदाधिकारी व न्यायेगु अनुगमनया पदाधिकारीत नाप सहलह याइगु जानकारी समितिया सभापति रामकृष्ण यादवं बियादिल ।
आइतवाःया बैठकय् समितिया दुजःतय्सं एमआरपी छपाइ सम्बधन्य् परराष्ट्रमन्त्री सुजाता कोइराला नाप न्यनेकने याःगु खः । न्यनेकने लिपाः समितिं मन्त्री कोइरालायात भारत बाहेकया मेगु देशं नं पासपोर्ट छपाइ प्रकृया सुरु यायेत निर्देशन ब्यूगु खः ।
अथेहे बैठकय् मन्त्री कोइराला व परराष्ट्र सचिव मदन भट्टराई नाप पासपोर्ट छपाइ ज्याय् ढिला जुयाच्वंगु बारे न्यनेकने याःगु खः । उगु इलय् मन्त्री कोइरालां निर्धारित इलय् हे एमआरपी जारी जुइगु दाबी यानादिल । नापं वयेकलं छुं प्राविधिक विषय मिले यायेत जक ढिला जूगु धयादिसें प्राविधिकतय् छगू पुचः आइतवाः हे भारत वनीगु जानकारी बियादिल ।
