भ्यालेन्टाइन डेया ब्यापारीकरण
येँ (सन्ध्या टाइम्स)/विश्वया थीथी देशय् थें नेपालय् नं ल्याय्म्ह ल्यासेतय् थौं मतिना दिवस अर्थात भ्यालेन्टाइन डे न्यायेकाच्वंगु दु ।
तर मतिना अभिव्यक्त याइगु थ्व संवेदनशील न्हियात थनया थीथी व्यवसायीतय्सं धाःसा थःपिनि ब्यापार बढे यायेगु छगू बांलाःगु माध्यम दयेकूगु खनेदु। न्हापा जूसा भ्यालेन्टाइन डे कुन्हु छुं भचा कार्ड व मेगु चिचीधंगु ज्वलंया जक ब्यापार जुइगु खःसा थुगुसी रेष्टुरेन्ट, संगीत, फिल्म, ई-बिजनेस याइपिंसं तकं थुकियात ब्यापारया माध्यम दयेकूगु दु।
थुगुसीनिसें मुन्चा डट कमं इन्टरनेट मार्फत नं थः यःगु सामान न्यानाः थः यःम्हेसिथाय् छ्वया बीगु सेवा शुरु याःगु दु ।
उखे येँया ठमेल लगायत ख्वपया नगरकोटय् च्वंगु होटल व्यवसायीतय्सं नं भ्यालेन्टाइन डेया लसताय् थीथी प्याकेजत न्ह्यःने हःगु दु। थौं थीथी कथंया सांगीतिक ज्याझ्वःत नं आयोजना यानाच्वंगु दु ।
थुगुसी राजधानीं पिहां वइगु थीथी पत्रपत्रिकात नं पूरा हे भ्यालेन्टाइनमय जुयाः प्रकाशित जूगु खनेदत। मतिना दिवसया प्रचारय् थुकिं यक्व हे तिबः बिउगु सीदु ।
उलि जक मखु थुगुसी छेँय् च्वनाः स्वयेगु फिल्म तकं भ्यालेन्टाइन डेपाखें प्रभावित जुयाः उकथंया हे मतिनाया फिल्मं बजाः काःगु खँ थनया स्थानीय सीडी पसल्यातय्सं धाःगु दु ।
मेबलय् स्वयाः थुगुसी भ्यालेन्टाइन ब्यापार अप्वये फुगु व्यवसायीतय् बिचाः दु ।
