नेवाः न्ह्यलुवातपाखें १४ प्रदेशयात लसकुस
येँ (सन्ध्या टाइम्स)/संविधानसभाया राज्य पुनर्संरचना समितिपाखें तयार याःगु १४ प्रदेशया नक्सायात नेवाःतय्सं स्वीकार यायेमाःगु बिचाः न्ह्यलुवातय्सं प्वंकूगु दु। नेवाः देय् दबूया संरक्षक मल्ल के. सुन्दरं उगु नक्साय् नेवाःतय् जातीय पहिचान स्पष्ट जुइक राज्य किटान यानातःगु सकारात्मक खँ खः धासें नेवाः राज्ययात तामाङ प्रदेशं घेरे मयाकेत व भारतलिसे स्वाइगु लँपु दयेकेत नारायणी प्रदेश वःगु जुयाः उकियात विरोध यायेमाःगु आवश्यकता मदु धयादीगु दु ।
नेवाः जागरण मञ्चपाखें शुक्रवाः याःगु छगू ज्याझ्वलय् न्ववासें वय्कलं अथे खःसां नेवाः लागायात भूमि मगाःगु व अविशिष्ट अधिकार केन्द्रय् तयेगु लिसें चाहे जुल धाःसा केन्द्रं प्रादेशिक संसद भंग याये फइगु अधिकारया धाःसा विरोध यायेमाः धयादिल ।
नेवाः स्वायत्त राज्य मंकाः संघर्ष समितिया नायः नरेन्द्रभक्त हाडां थ्व १४ प्रदेशया नक्सां प्राप्त जूगु उपलब्धीया रक्षा यानाः मगाःगु अधिकार कायेत संघर्ष यायेमाःगु बिचाः प्वंकादिल।
नेपाः राष्ट्रिय पार्टीया सभासद् बुद्ध साय्मिं यदि नेवाः प्रदेशया भूमि आः ति हे जक कायम जुल धाःसा व आत्मघाती जुइ धयादिल ।
मञ्चया संयोजक सुजीव वज्राचार्यया सभापतित्वय् जूगु उगु ज्याझ्वलय् लोकतान्त्रिक नेवाः संघया नायः सानुराजा शाक्य, नेवाः राष्ट्रिय मुक्ति मोर्चा येँ जिल्लाया नायः उमेश स्थापित, ज्यापु महागुथिया उर्मिला डंगोलपिंसं नं न्ववानादीगु खः ।
