संविधान वयेधुंकाः जक सेना समायोजन
येँ (सन्ध्या टाइम्स)/एनेकपा (माओवादी) या नेता सीपी गजुरेलं यदि आः वइगु जेठ १४ गते नं संविधान जारी याये मफुत धाःसा मेगु खुला थपे याये फइगु खँ कनादीगु दु। देशय् संविधान दयेके मबीगु लागिं अनेक षडयन्त्रत जुयाच्वंगु दु धासें वय्कलं यदि इलय् संविधान मवःसा मेगु खुला थपे यानाःसां संविधान जारी यायेमाःगु खँ वय्कलं कनादीगु खः।
छुं जुयाः निर्धारित इलय् नं संविधान जारी याये मफुत धाःसा संविधानसभा जक भंग जुइगु मखु वहे संविधानसभां ल्ययातःम्ह राष्ट्रपतिया नं म्याद फुइ धासें थुकी बेतुक खँ मल्हायेत नं इनाप यानादीगु दु ।
लिसें वय्कलं न्हूगु संविधान जारी मयाःतले माओवादी लडाकु समायोजन याये मजिउगु तर्क नं तयादीगु दु। संविधान पिमकायेगु लागिं अनेक षडयन्त्र जुयाच्वंगु कारणं न्हूगु संविधान वयेधुंकाः जक लडाकुया समायोजन यायेमाःगु बिचाः नं प्वंकादिल ।
