कारोबार वंगु वालय् स्वयां नं क्वय्
येँ (सन्ध्या टाइम्स)/स्टक एक्सचेन्जय् थ्व वाःया दुने जूगु शेयर कारोबारं बजार परिसुचक नेप्से ० दशमलव १० अंकं कुहां वंगु दु। वाःया न्हापांगु न्हि ४९७ दशमलव ३४ अंकं शुरु जूगु शेयर कारोबार वाःया लिपांगु न्हि ४९७ दशमलव २४ अंकय् थ्यंकाः बन्द जुल ।
थ्व छवाःया दुने स्टक एक्सचेन्जय् चय्न्यागू कम्पनीया ४७३९ कारोबारं स्वंगू लख न्हय्गुद्वः व प्यसः कित्ता शेयर न्याये-मी जुयाः झिंन्हय्गू करोड ख्वीगू लख न्हय्न्हय्द्वः तका दांया काराबेर जूगु दु ।
थ्वयां न्ह्यः ४६२७ कारोबारय् स्वंगू लख स्वीनिद्वः व खुसः कित्ता शेयर न्याये-मी जुयाः झिंखुगू करोड ख्वीछगू लख पीनिद्वः तका दांया कारोबार जूगु खः ।
दांया ल्याखं थ्व वाःया कारोबारय् शुन्य दशमलव ४५ प्रतिशतं कुहां वःगु दु।थ्व ल्याखं दांया कारोबार वंगु वालय् स्वयां ५ दशमलव ९८ प्रतिशतं थहां वंगु दु ।
अथेहे 'क' समुहया कारोबार मापन याइगु सेन्सेटिभ २ दशमलव ५४ अंकं कुहां वःगु दु। थुगु समुहया कारोबार १२१ दशमलव ८६ अंकं शुरु जूगु खःसा वाःया लिपांगु न्हि ११९ दशमलव ३२ अंकय् थ्यंकाः बजाः बन्द जूगु खः। थुगु समुहया जक गुंगू करोड तका दांया कारोबार जूगु दुसा थ्व नेप्सेय् जूगु कूल कारोबारया ६१ दशमलव ७७ प्रतिशत खः ।
थुगु छवाःया दुने दकलय् अप्वः शेयर न्याये-मी यानाः स्वंगू करोड पीछगू लख तका दां कारोबार याःगु स्टायण्डर्ड चार्टर्ड बैंक व शेयर अप्वः स्वीप्यद्वः कित्ता शेयर व ५३९ क्वः तक कारोबार याःगु लिधंसाय् भिवोर विकास बैंक दकलय् न्ह्यःने लाःगु दु ।
नेपाल स्टक एक्सचेन्जय् थ्व वालय् मुक्कं न्यान्हे जक शेयर कारोबार जूगु दुसा सरकारी व संस्थागत पाखे छगू ऋणपत्र कारोबार जूगु मदु ।
