लडाकुया मार्चपास बिनाः जनयुद्ध दिवस हनं
तत्कालीन नेकपा (माओवादीं) २०५२ फागुन १ गते शुरु याःगु जनयुद्ध झिंन्यादँ क्यंगु लसताय् एनेकपा (माओवादीं) शनिवाः देय्न्यंक थीथी ज्याझ्वः यानाः हंगु दु । न्हापा लडाकुतय् मार्चपास व थीथी युद्धकलाया प्रदर्शनी यानाः हनीगु खःसां थुसी येँया तिंख्यलय् सामान्य ढंगं जनयुद्ध दिवसया ज्याझ्वः याःगु दु ।
सरकारया इनपा कथं माओवादी सेनाया लडाकुतय्सं जनयुद्ध दिवसया मार्चपास लगयातया ज्याझ्वलय् ब्वति मका । वंगु माघ २८ गते सरकारं लडाकुयात थःगु सार्वजनिक ज्याझ्वलय् ल्वाभः व कम्ब्याट सहित ब्वति मयाकेत इनाप याःगु खः ।
जनयुद्ध शुरु जूगु झिन्यादँ क्यंगु लसताय् जनमुक्ति सेना स्पोर्टस् क्लवं थीथी कासा धेंधेंबल्लाया ग्वसाः ग्वःगुलि ज्याझ्वलय् राष्ट्रिय म्ये सहित कासामितय्सं साधा वसतय् मार्चपास याःगु खः । ज्याझ्वलय् राष्ट्रिय ध्वाँय्, माओवादी सेनाया ध्वाँय् व माओवादी ध्वाँय् ब्वयेकातःगु खः ।
ज्याझ्व:या उल्लेज्या यानादिसें माओवादी अध्यक्ष पुष्पकमल दाहाल 'प्रचण्डं' उगु धेधेंबल्लाय् नेपाली सेनां व प्रहरीं ब्वति मकाःगु धइगु शान्तिया विरुद्ध जूगु धयादिल । वयेकलं कासा ख्यः थंज्याःगु मित्रता व आपसी भाइचारा अप्वयेके फइगु ख्यलय् नं पूर्वाग्रह तयाः ब्वति मका:गु धइगु शान्ति प्रकृयायात स्यंकेत स्व:गु द्वपं बियादिल । वयेकलं सरकारया पाखें नं थ्व धेंधेंबल्ला असफल यायेत अवरोध खडा याःगु धयादिसें सरकारं छुं छुं कासा याकेमब्यूगु धयादिल ।
वयेकलं उच्चस्तरीय राजनीतिक संयन्त्र मार्फत गतिरोधया समाधान मालाच्वनाःगु धयादिसें माओवादी शान्ति व संविधान निर्माणया निंतिं गम्भीर जुया लगेजुयाच्वंगु धयादिल । वयेकलं थुकीया विरुद्ध षड्यन्त्र जुसाः अझ तःधंगु आन्दोलन यायेगु ख्याच्वः नं बियादिल ।
माओवादीं थःगु जनयुद्ध शुरु याःगु न्हियात जनयुद्ध दिवसया रुपय् हरेक दँय् थीथी ज्याझ्वः यानाः न्यायेकाः वयाच्वंगु दु ।
