थौ महाशिवरात्री / राष्ट्रपति पाखें पशुपतिया दर्शन
थौं सिल्लागा चःर्हे अर्थात महाशिवारात्री । थौ येँया पशुपति नापं देय्न्यंयक शिवया देगलय् सुथंनिसें भक्तजनत वनाः पुजाअर्चना याःगु दु । थौ शिवया पुजा याःसाः दिव्यज्ञान प्राप्त जुयाः सुख, शान्ति व समृद्धि दइगु विश्वास दु ।
महाशिवरात्रीया लसताय् राष्ट्रपति डा. रामवरण यादव नं शुक्रवाः सनिलय् पशुपति झाया: दर्शन यानादीगु दु । वस्वां न्ह्यः शुक्रवाः सुथं निसें लखौंया ल्याख्य् भक्तजनतसय्सं पशुपति वनाः दर्शन याःगु दु । शिवरात्रीया झ्वलय् न्हय्गू लख श्रद्धालुतय्सं पशुपतिनाथ देगलय् दर्शन या:गु खँ पशुपति क्षेत्र विकाश कोषं धा:गु दु ।
शिवरात्रीया निंतिं पशुपतिया प्यंगूलिं लुखाः चायेकाः व्यवस्थित रुपं दर्शनार्थीयात लाइनय् च्वनेगु व्यवस्था याःगु खः । पशुपति दर्शनया निंतिं तिलगंगा, मित्रपार्क, गौसाला व जयबागेश्वरीया लुखां दुहांवनेगु व्यवस्था याःगु खःसा पश्चिम लुखां जक पिहांवनेगु व्यवस्था याःगु खः ।
अथेहे महनगरीय ट्राफिक प्रहरीं सतक जाम जुइबमीत कोटेश्वर, चाबहील आदि क्षेत्रय् वैकल्पिक लँया व्यवस्था याःगु खः । उगु इलय् सतक व्यवस्थापन यायेत निसलं मल्याक प्रहरी परिचालन याःगु खः ।
