सरकार प्रति कांग्रेस असन्तुष्ट
नेपाली कांग्रेसया कार्यवहाक सभापति सुशील कोइरालां वर्तमान सरकारया कार्यशैली प्रति कांग्रेस असन्तुष्ट जूगु खँ धयादीगु दु । तर वयेकलं सरकार प्रति कांग्रेस असन्तुष्ट जुसां तत्काल सरकार पाखें थःगु पार्टीया मन्त्रीतय्त लितमसतीगु धयादिल । नापं वयेकलं सरकारया ज्याखँ प्रभावकारी यायेत कांग्रेसं प्रधानमन्त्रीयात दवाब बीगु धयादिल ।
रिपोटर्स क्लबं शुक्रवाः येँ याःगु छगू साक्षात्कार ज्याझ्वलय् न्ववानादिसें कार्यवहाक सभापति कोइरालां कांग्रेस संविधानसभाया ई तनेगु पक्षय् मदुगु धयादिसें माओवादीं चाहे जुसाः इलय् हे संविधान निर्माण जुइगु धयादिल । वयेकलं माओवादीयात गम्भीर जुयाः संविधान निर्माणय् लगेजुइत नं इनाप यानादिल । अथेहे वयेकलं न्हूगु संविधान जारी याये न्ह्यः हे माओवादी लडाकुया समायोजन, व्यवस्थापन लगायत दक्वं शान्ति प्रकृयाया ज्या क्वचायेके माःगु बिचा: प्वंकादिल ।
अथेहे मेगू छगू प्रसंगय् वयेकलं कांग्रेसया आगामी अधिवेशन लिपाः कांग्रेसयात न्हूगु तरिकां न्ह्याकेत थःम्हं तयारी यानाच्वनाःगु जानकारी बियादिल ।
