संविधान दयेकेत आः छु छु याये ल्यं दनि ?
येँ (सन्ध्या टाइम्स)/वइगु जेष्ठ १४ गते न्हूगु संविधान जारी यायेगु खँ नेपाःया अन्तिरिम संविधानय् उल्लेख यानातःसां आः वयाः वकुन्हु संविधान जारी याये फइ वा मफइ धइगु खँय् वहस शुरु जूगु दु ।
राजनीतिक दलया नेतातय्सं इलय् हे संविधान जारी यायेमाः धयाच्वंसां संविधान दयेकेत याये ल्यं दनिगु ज्या स्वयेबलय् धाःसा वकुन्हु संविधान जारी याये फइगु संभावना झन झन म्हो जुया वंगु खनेदु ।
संविधानसभाया झिंछगुलिं हे विषयगत समितिपाखें थःथःपिनि प्रारम्भिक मस्यौदा तयार यानाः संविधानसभायात लःल्हाये धुंकूगु दुसा उकियात कयाः संभासदतय्सं बिचाः तयेगु ज्या नं क्वचायेधुंकूगु दु।
आः सभासदपिनि सुझावत दुथ्याकाः पूर्ण संविधानया हे खाका तयार यायेत मस्यौदा समितिं ज्या यानाच्वंगु दु। आः तकया दुने मस्यौदा समितिं झिंछगू समितिया प्रतिवेदन मध्ये प्राकृतिक स्रेत तथा शक्ति बाँडफाँड समितिया प्रतिवेदन जक तयार यानाः संविधानसभाया दकलय् महत्वपूर्ण समिति कथं नालातःगु संवैधानिक समितियात लःल्हाये धुंकूगु दु। संवैधानिक समितिं नं फुक्कं विषयगत समितिया प्रतिवेदनयात मूर्त रुप बीगु निंतिं सैद्धान्तिक आधार तयार यायेत छगू उपसमिति दयेकूगु दु ।
प्रतिवेदन अध्ययन समितिपाखें गुलि नं प्रतिवेदनत तयार याइ उकियात सैंवैधानिक समितिइ सहलह ब्याकाः मस्यौदाया रुपय् संविधानसभायात लःल्हायेमाःगु प्रावधान दु। व ज्या उगु समितिं थ्वहे फागुन ११ गते तकया दुने क्वचायेके माःगु खःसां व ज्या हे इलय् क्वचायेके फइगु सम्भावना मदुनि। अनं लिपा संविधानया मस्यौदायात कयाः संविधानसभाय् सहलह ब्याकेधुंकाः लछि तक जनताया दथुइ वनाः सभासद्तय्सं मस्यौदा सविधान बारे राय कायेगु ज्या याइ। अनंलि जनतापाखें वःगु सुझावयात समेत दुथ्याकाः संविधानया अन्तिम मस्यौदा तयार याइ। उगु मस्यौदायात संविधानसभाय् सहलह ब्याकाः संविधानया हरेक बुँदात दुइ तिहाइ बहुमतं पारित यानाः जक न्हूगु संविधान जारी यायेमाःगु प्रावधान दयेका तःगु दु ।
