मिं नयाः खुखा छेँ ध्वस्त

येँ (सन्ध्या टाइम्स)/रौतहटया पञ्चरुखी गाविसय् थौं सुथय् मिं नयाः खुखा छेँ ध्वस्त जुल ।

उगु गाविसया वडा नं. ८ पोखरीया त्वालय् सिताराम महतोया छेँनं शुरु जूगु उगु मिं जःलाखःला श्यामलाल यादव, नागेन्द्र महतो, जादुलाल महतो, धरीछन यादवया नापं यानाः खुखा छेँ ध्वस्त जूगु खः। थौं सुथय् ३:३० बजेपाखे उगु मि च्याःगु खः ।

उगु मियात सशस्त्र प्रहरी, जनपद प्रहरी व स्थानीय मनूत जानाः एक घण्टा लिपा तिनि नियन्त्रणय् कायेफुगु खः। मिं नःगुया कारण धाःसा पत्ता लगे मजूनि ।