'दलत दथुइ भिष्मप्रतिज्ञा आवश्यक'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' शान्ति प्रकृयायात सफल यायेत व इलय् हे संविधान जारी यायेत दक्वं दलत दथुइ भिष्मप्रतिज्ञा आवश्यक जूगु खँ धयादीगु दु । वयेकलं देशय्या समस्यायात निकास बीत यक्व बलिदान यानाःगु खँ न्ह्यथंनादिसें समाजया दक्वं तह व तप्काया समस्यायात दुथ्याकाः राष्ट्रिय सहमति कायम यायेमाःगु खँय् बः बियादिल ।
सुनसरीया चताराय् ग्वसाःग्वःगु झिन्हून्यंकया योगशिविरया शुक्रवाः उल्लेज्या यानादिसें वयेकलं शान्ति प्रकृयाया व संविधान जारी यायेत विदेशीतय् ख्वाः स्वयाः च्वंसाः तसकं दुर्भाथ्यपूर्ण जुइगु धयादिल । वयेकलं इलय् हे संविधान जारी मजूसाः देय् तसकं खतरनाक मोडय् लाइगुलिं दलत दथुइ एकता जुइमाः धयादिल ।
वयेकल दलत दथुइया एकताया निंतिं लिप्पांगु इलय् सकारात्मक पहल जुयाच्वंगु धयादिसें दलत दथुइ एकता जुइमफुसाः न्हूगु नेपाल निर्माणया परिकल्पना विफल जुइगु सम्भावना दुगु धयादिल ।
