प्रधानमन्त्री पाखें नेपाली सेनाया प्रशंसा
थौं सेना दिवस
शिवरात्री कुन्हु न्यायेकीगु सेना दिवसया लसताय् नेपाली सेनां छगू ज्याझ्वः यानाः हंगु दु । येँया शुक्रवा: तिंख्यलय् छगू विषेश ज्याझ्वः यानाः सेना दिवस न्यायेकूगु दु । ज्याझवलय् शिवरात्रीयाया बढाँइ नापं सैनिक कला प्रदर्शन याःगु ख: ।
ज्याझ्वलय् राष्ट्रपति डा. रामवरण यादव, उपराष्ट्रपति परमानन्द झा, प्रधानमन्त्री माधवकुमार नेपाल, सभामुख सुवासचन्द्र नेम्वाङ, मन्त्रीत, विदेशी कुटनीटिक नियोगया प्रतिनिधि लगायतया ब्वति दुगु खः ।
थ्वहे दथुइ सेना दिवसया लसताय् प्रधानमन्त्री माधवकुमार नेपालं भिंतुना सन्देश बियादिसें नेपाली सेनाया अविचलित अनुशासन, निष्ठा व बलिदाया प्रशंसा यानादीगु दु । वयेकलं राष्ट्र व जनताया निंतिं थःगु प्राण आहुती बीपिं वीर सैनिक प्रति श्रदाञ्जली नं प्वंकादीगु दु ।
वयेकलं नेपाली सेनां राष्ट्रिय अखण्डता, स्वतन्त्रता व अक्षुणताया रक्षाया निंतिं न्हापा गौरवशाली लडाइ ल्वाःगु खँ धयादिसें राष्ट्रिय स्वाभिमान व हित संरक्षण-सम्बर्द्धन यायेत इतिहासय् जक मखु आः नं नेपाली सेनां प्रशंसनीय भूमिका म्हिता च्वंगु खँ धयादीगु दु ।
अथेहे रक्षामन्त्री विद्यादेवी भण्डारीं नं भिंतुना सन्देश बियादिसें राज्या स्वतन्त्रता, सार्वभौमिकता, भौगोलिक अखण्डता व राष्ट्रिय एकताया संरक्षण व प्रतिरक्षाया जिम्मेवारी काःगु नेपाली सेनां दक्वं हाथ्यायात सम्बोधन यासें सामर्थ्यवना नापं अनुशासित शत्तिया रुपय् थःयात विकसित यानाः थःगु उपस्थिति समेत प्रमाणित याःगु खँ न्ह्यथंनादिल ।
सेना दिवसया हे लसताय् प्रधानसेनापति छत्रमानिसंह गुरुङं सेनाया सकल दर्जायात भिंतुना बियादीगु दु । वयेकलं भिंतुना बियादिसें उच्च पेशागत क्षमता कायम तयेगु नापं थःगु अराजनैतिक चरित्रयात अक्षुण तयाः राष्ट्रया मंकाः शत्तिया कथं च्वनेगु सेनाया वास्तविकता जूगु न्हथनादिल ।
