सेना समायोजन मजुसाः संयन्त्र औचित्यहिन : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं माओवादी लडाकुत नेपाली सेनाय् समायोजन मजुसाः उच्चस्तरीय राजनीतिक संयन्त्र औचित्यहिन जुइगु खँ धयादीगु दु । वयेकलं संयन्त्रया मू आज्जू वर्तमान राजनीतिक समास्या समाधान यायेगु जूगु स्पष्ट यानादिसें सरकार संचालन यायेत थ्व संयन्त्र गठन मजूगु दाबी यानदिल ।
शुक्रवाः विराटनगर विमानस्थलय् पत्रकारत नाप खँल्हाबंला यानादिसें नेता भट्टराईं संयन्त्रं सहज राजनीतिक वातावरण दयेकाः कतामरी सरकारयात विस्थापित यानाः माओवादी नेतृत्वया राष्ट्रिय सरकार दयेकेगु वातावरण तयार याइगु धयादिल । वयेकलं सयन्त्रं गतिरोध अन्त्य यायेगु पाखे राजनीतिक परिणाम मब्यूसाः उकीया छुं अर्थ मदइगु धयादिल ।
अथेहे वयेकलं माओवादी इलय् हे संविधान जारी जुइमाः धइगु पक्षय् दुगु व इलय् हे संविधान जारी यायेत प्रयत्नशील जुयाच्वंगु धयादिल । नापं वयेकलं इलय् हे संविधान निर्माण मजुसाः राष्ट्रपति, सरकार, दलत सुंनं मदइगु व उगु इलय् सु बल्ला वहे देशय् हावी जुइगु धयादिल ।
