जमिम हत्याया आशंकाय् ज्वंम्हेसित त्वःतल

संचार उद्यमी जमिम शाहया हत्याया आशंकाय् प्रहरीं बिहीवाः न्हिनय् त्रिभुवन अन्तराष्ट्रिय विमानस्थलय् ज्वंम्ह छम्ह भारतीय नागरिकयात बिहीवाः सनिलय् हे त्वःतुगु दु । हत्याया आशंकाय् प्रहरीं भारतीय नागरिक मनोज अब्बुकरया न्हिनय् स्वतात्याः इलय् ज्वंगु खः । लिपाः हत्याय् अब्बुकरया संलग्नता पुष्टि मजूगुलिं त्वःतुगु खँ प्रहरीं धाःगु खः । हत्याया संलग्न अपराधीया हुलिया अब्बुकर नाप मिलेजूगुलिं वयात प्रहरीं स्वघौ नियन्त्रणय् का:गु ख: ।

येँ नं जेट एयरया विमानं दिल्ली वनेत्यंम्ह भारतीय नागरिक अब्बुकरयात प्रहरीं ज्वना न्यनेकने याःगु खः । अब्बुकर बिहीवाः सुथय् विराटनगर पाखें येँ वःगु व संका लगेजुया ज्वना न्यनेकने यानाःगु खँ प्रहरीं धाःगु दु । भारतया मध्यप्रदेश या बिपुला जिल्लाय् च्वनीम्ह अब्बुकर मोरङय् ज्या यानाच्वंम्ह खः ।