हज यात्राया अनियमितताया सम्बन्धय् प्रम व गृहमन्त्रीलिसे जानकारी माग
वंगु दँय् हज यात्राया झ्वलय् जूगु अनियमितताया सम्बन्धय् व्यवस्थापिका संसदया सार्वजनिक लेखा समितिं प्रधानमन्त्री व गृहमन्त्री लिसे जानकारी माग याइगु जूगु दु । वंगु दँया हज यात्राया झ्वलय् जूगु अनियमितता छानविन यानाच्वंगु समितिं थप जानकारीया निंतिं प्रधानमन्त्री माधवकुमार नेपाल व गृहमन्त्री भीम रावलयात सतेगु निर्णय या:गु खँ समितिया सभापति रामकृष्ण यादवं जानकारी बियादिल ।
समितिया थौं च्वंगु बैठकय् समितिया दुजत दथुइ उगु विषययात कया: छगू मत जुइमफुसां नं समितिं प्रधानमन्त्री व गृहमन्त्रीयात बैठकय् सतेगु निर्णय या:गु ख: । समितिं छु नं विषयया बारे छानविन यायेत प्रधानमन्त्रीयात सतेगु निर्णय या:गु थ्व न्हापांगु घटना ख: । यद्यपि बैठकं प्रधानमन्त्रीयात सतेगु ई धा:सा: क्वछ्यूगु मदुनी । समितिया सभापति रामकृष्ण यादवं वइगु फागुण ६ गते लिपाया बैठकय् जक प्रधानमन्त्रीयात सतेगु ई निश्चित जुइगु जानकारी बियादिल ।
बैठकं हज कमिटिया खर्च सम्बन्धय् साउदि अरेबियास्थित नेपाली दुतावासं छ्वयाहगु अभिलेखयात न्हय्न्हू दुने लेखा परिक्षण याका समितिइ ल:ल्हायेत गृहमन्त्रालययात उजं नं ब्यूगु दु । अथेहे समितिं लेखा परिक्षणय् ग्वाहालि यायेत महालेखा परिक्षकया ज्याकूयात समेत उजं ब्युगु दु ।
