न्हिं १६ घण्टाया ग्यानापुगु लोडशेडिङ
माओवादी नेतृत्वया सरकारं म्हिगःनिसें लागू जुइ कथं शुरु याःगु न्हिं १६ घण्टा लोशशेडिङया विरोधय् सर्वसाधारण जनता सतकय् कुहां वःगु दु । सरकारया थ्व ज्याया विरोधय् थाय्थासय् च्वंपिं जनता सतकय् कुहां वयाः लोडशेडिङ चीकेमाःगु माग यानाच्वंगु दु । लोडशेडिङया विरोधय् राजधानीया जनता आः तिनि सतकय् वःगु खःसां पिने गुलिखे जिल्लाय् ला उकुन्हु हे मनूत सतकय् वयाः तोडफोड धर्ना तालाबन्दी आदि थेंज्याःगु ज्याखँत शुरु यायेधुंकूगु दु । यदि न्हिं १६ घण्टाया थ्व ग्यानापुगु लोडशेडिङ अझ छुं ई जारी जुल धाःसा जनताया धैर्य बांमलाकहे त्वाःदलीगु खतरा दु । नेपालय् जूगु थ्व लोडशेडिङ ऐतिहासिक व कल्पना हे याये मफइगु खँ खः । थुकिं यानाः सर्वसाधारण जनतां छुं हे याये मफइगु अवस्था पिकया बिउगु दु । खतुं सरकारं औद्योगिक क्षेत्रय् थज्याःगु समस्या मवयेमा धकाः अन मत बीगु विशेष व्यवस्था याःगु दु । तर थीथी थासय् च्वनाः घरेलु उद्योग चले यानाच्वंपिंत धाःसा छुं हे ध्यान बिउगु खनेमदु । आः मतया लिधंसाय् घरेलु ज्या यायेगु ला झन सम्भव हे मंत । थुकिं मनूतय् कमे यायेगु आधारय् समेत लिच्वः लाकूगु दुसा भविष्यया कर्णधार धाःपिं मस्तय् ब्वनेज्यायात ला झन् ध्वस्त हे याना बीगु खतरा दु ।
थ्व ग्यानापुगु अवस्थापाखें देय्यात गुलि फु उलि याकनं मुक्त यायेगुपाखे सरकार लगे जुइमाः । थ्व लोडशेडिङं नेपाःया आर्थिक विकासयात लिउने लाका बिउगु जक मखु सामाजिक जनजीवनयात नं प्रभावित यानाच्वंगु दु । थुकिया विरोधय् पिदनाच्वंगु ज्याझ्वःतय्सं कन्हय् सरकारयात हे खतराय् लाका बीफु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
