शिक्षा क्षेत्रया विकासय् सरकारं नुग: क्येकूंके मज्यूगु : राष्ट्रपति
राष्ट्रपति डाक्टर रामवरण यादवं शिक्षा क्षेत्रया विकासय् सरकारं नुग: क्येकूंके मज्यूगु खँय् ब: ब्यादीगु दु । शिक्षा व स्वास्थ्य जनताया नैसर्गिक अधिकार जुगूलिं उकिया विकास यायेत राज्य गम्भीर जुया वनेमा:गु बिचा: वय्कया प्वंकादिल।
बिहीवा: सुथय् राष्ट्रपति भवन शितल निवासय् महिला सिप विकास केन्द्र पाखें ल:ल्हा:गु ज्ञापनपौ कयादिसें वय्कलं शिक्षाया विकासया निंतिं योजनावद्ध रुपं न्ह्यने न्ह्यायेत सरकारयात इनाप यायेगु आश्वासन बियादिगु ख: । देशया थीथी जिल्लाय् गृहिणी शिक्षा सञ्चालन यानाच्वंगु महिला सिप विकास केन्द्रं विहीवा: राष्ट्रपति यादवयात झिंस्वंगु बुँदे ज्ञापनपौ ल:ल्हा:गु ख: ।
ज्ञापनपौलय् सरकारं गृहिणी शिक्षायात देय्न्यंक लागू यायेमागु, माघ २२ गतेयात गृहिणी शिक्षा दिवस घोषणा यायेमा:गु, गृहिणी शिक्षा ब्वंकीपिं शिक्षिकातय्त पारिश्रमिक बिइमा:गु, इलय् हे पाठ्यक्रम उपलब्ध यायेमा:गु लगायतया माग तया ज्ञापनपौ ल:ल्हागु खँ केन्द्रया नकिं रीता खनालं कनादिल ।
