सपथ लिपा न्हापांगु खुसिइ राष्ट्रपति उपराष्ट्रपति नापलात
निष्क्रिय जुयाच्वंगु उपराष्ट्रपति पद सक्रिय जुइवं राष्ट्रपति डाक्टर रामवरण यादव व उपराष्ट्रपति परमानन्द झा दथुइ थौं न्हापांगु खुसिइ औपचारिक नापलायेगु ज्या जूगु दु । राष्ट्रपति ज्याकु शीतल निवासय् वय्कः दथुइ थ्यंमथ्यं बाघौ नापलायेगु ज्या जूगु खः ।
नपालायेगु भुवलय् राष्ट्रपति डाक्टर यादवया आसन्न भारत भ्रमणया विषयसं खँल्हाबल्हा जूगु खः । राष्ट्रपति डाक्टर यादव फागुन ३ निसें ६ गते तक स्वन्हूया भारतया राजकीय भ्रमणय् झायादीत्यंगु दु । थौंया नापलायेगु भुवलय् भारत भ्रमणय् जक केन्द्रित जूगु राष्ट्रपति ज्याकूया छ्याञ्जे वामनप्रसाद न्यौपानें धयादिल । वय्कः दथुइ निता इलय् नापलायेगु ज्याझ्वः क्वःछ्यूगु खःसां राष्ट्रपति डाक्टर यादव ब्यस्त जूगु हुनिं निता ई जुइ झिंन्यागू मिनेट न्ह्यः हे वय्कःपिं दथुइ नापलायेगु ज्या जूगु खः ।
उपराष्ट्रपति परमानन्द झां हिन्दीइ काःगु सपथ असंवैधानिक धासें सर्वोच्च अदालतं नेपाली सपथ कायेत निर्देशन बिइवं थुगु पद निस्क्रिय जूगु खः । अन्तरिम संविधान न्हय्क्वःगु खुसिइ भिंकाः उच्च पदस्थ पदाधिकारीं मांभासं नं सपथ कायेदइगु प्रावधान तयेवं उपराष्ट्रपति झां वंगु वालय् हाकनं नेपाली व मैथिलीं सपथ काःगु खः ।
