स्वंगू दल इमानदार जूसा झिंनिन्हू दुने हे संविधान : उपप्रम

सहमति जूसा न्हय्न्हुं हे संविधान : गजुरेल

उपप्रधानमन्त्री विजयकुमार गच्छदारं न्हूगु संविधान निर्माण यायेत स्वंगू दल इमानदार जुइ आवश्यक जूगु खँ धयादीगु दु । वयेकलं प्रमुख स्वंगू दलत माओवादी, कांग्रेस व एमाले इमान्दार जुयाः संविधान निर्माण यायेगु ज्याय् लगे जुसाः निर्धारित इलय् हे संविधान निर्माण जुइगु धयादिल । वयेकलं धयादिल, 'स्वंगू दल इमान्दार जुसाः झिंनिन्हूया दुने हे संविधान निर्माण जुइफू ।'

विहीवाः नेपालगञ्जय् प्रेस युनियनं याःगु पत्रकार नापलायेगु ज्याझ्वलय् न्हूगु संविधान न्ह्यः हे माओवादी लडाकुया व्यवस्थापन व पुनस्थापना यायेमाःगु बिचाः प्वंकादिल । वयेकलं न्हूगु संविधान निर्माण याये स्वयां झिन्यान्हू न्ह्यः लडाकु पुनस्थापन यायेमाःगु बिचाः नीनिगू गठबन्धया बिचाः जूगु धयादिल ।

वयेकलं संविधान च्वयेत सछिन्हू ल्यं दनीगु इलय् संविधानसभाया म्याद तनेमाःगु बिचाः वयाच्वंगु प्रति आक्रोश प्वंकादिसें वयेकलं अज्याःगु बिचाः अपरिपक्को जूगु धयादिल । वयेकलं सहमति व समझदारीपाखें हे न्हूगु संविधान व शान्ति स्थापना यानाः न्हूगु जनादेशय् वनेमाःगु धयादिल । नापं वयेकलं राजनीति सफल अवतरण जुइ मफुसाः देशय् भंयकर द्वन्द्व व मुठभेड जुइगु खतरा दुगु धयादिल ।

सहमति जुसाः न्हय्न्हुं हे संविधान : गजुरेल

एनेकपा (माओवादी)या नेता सीपी गजुरेलं दलत दथुइ सहमति जुसाः न्हय्न्हुं हे संविधान निर्माण जुइगु खँ धयादीगु दु । क्रान्तिकारी पत्रकार संघं बिहीवाः विराटनगरय् याःगु पत्रकार नापलायेगु ज्याझ्वल् वयेकलं दलत दथुइ सहमति मजुयाः संविधान निर्माणय् समस्या वःगु धयादिसें सहमति जुसाः संविधान निर्माण यायेत अपुइगु धयादिल ।

वयेकलं जतनया संघीय गणतन्त्र संस्थागत जुइ कथंया संविधान निर्माण यायेत माओवादी लगे जुयाच्वंगु दाबी यानादिल । अथेहे वयेकलं माओवादी नेतृत्वया राष्ट्रिय सरकार गठन मजुतल्ले संविधान निर्माण जुइत थाकुइगु कनादिल ।