द्यःपिनि नं मि कुइगु शिवरात्रि
कन्हय् सिलाचःर्हेया झ्वलय्
झिंनिलाया झिंनिगू हे चःर्हे वइथें उकी मध्येया छगू चःर्हे खः सिलाचःर्हे। फाल्गुण कृष्ण पक्ष सिल्लागा चःर्हे हे सिलाचःर्हे खः ।
झीगु संस्कारय् चान्हय् पर्व न्यायेकीगु थीथी रात्रित दु। गथे कृष्णाष्टमिया अहोरात्रि, मोहनिया नःला स्वने पारुनिसें स्याक्वत्याक्व कुन्हु तकया नवरात्रि, मोहनिया हे महाष्टमिया कालरात्रि, स्वन्तिया लक्ष्मी पुजा कुन्हुया सुखरात्रि, अले सिलाचःर्हेया शिवरात्रि ।
शिवरात्रि कुन्हु हनीम्ह द्यः महाद्यः खः। महाद्यःयात द्यःया नं महानम्ह द्यः कथं कयातःगु दु। ब्रम्हा, विष्णु, महेश्वर मध्ये महाद्यः स्वम्हम्ह खः। थ्व स्वम्ह त्रिदेवया वर्ण नं स्वंगू हे दु। गथे ब्रम्हाया म्हासु वर्ण, विष्णुया वाउँ वर्णसा महाद्यःया तुयू वर्ण। महाद्यःयात महादेव वा महेश जक मखु महेश्वर, रुद्र, शंकर, शिव, शम्भु, भोला, दिगम्बर, वरदाता आदि आपालं नामं म्हसीकेगु याः। महाद्यःया गुगुं तीर्थस्थलय् ल्वहंयागु लिंग जक नं दइसा गनं किपा हे नं तयातःगु दु ।
महाद्यःयात दकलय् यःगु नसा धइगु भाङ, धतुरो, गजि, कक्कर खःसा गसा द्वहं, ज्वँसा त्रिशुल व डबडब, तिसा गौमन नाग, वसः धुँयागु छ्यंगू खः। रुद्राक्षमाः नं महाद्यःया मेगु तिसा खः। महाद्यः कैलाशया नं पति व पशुया नं पति जूगुलिं वसपोलयात कैलाशपति व पशुपति नं धायेगु याः।
पुस माघया चिकुलाय् मनूतय् मि कुनाः लुमुकी थें झी नेवाःतय् थीथी द्यःपिंत नं मि कुंकाः लुमुके बीगु चलन दु। नगरया थीथी त्वालय् छु छु द्यः दु अन अन हे मि च्याकाः शिवरात्रि कुन्हु द्यःपिंत लुमुके बीगु चलन दु ।
स्वनिगः दुने शिवरात्रि कुन्हु दकलय् अप्वः भिड जुइगु थाय् धइगु पशुपति क्षेत्रया पशुपति देगः खः। थ्वकुन्हु थ्व देगःया प्यंगू दिशाय् च्वंगु प्यंगुलिं हे लुखा चायेकाः महाद्यःया दर्शन याये खनी। थन चछि न्हिछिं हे मेला जुयाच्वनी। थीथी थासं वःपिं मनूतय्गु तःधंगु हे भिड जुयाच्वनी। देगः जःखः गुलिं मनूत चछिं जाग्राम नं च्वनाच्वनी ।
येँ देय् दुने भिड जुइगु पशुपति जक मखु, नगर लागां पिने टंकेश्वर, भिममुक्तेश्वर, प्रतिवनेश्वर, कुलेश्वर महाद्यःयाथाय् नं मेला जुयाच्वनी। चान्हय्पाखे मि च्याकाः फकिर, जोगीत धुनी जगे यानाच्वनी। थज्याःगु भिडभाडय् थीथी कथंया पसः तयाः मेलाया व्यापार नं जुयाच्वनीगु स्वाभाविक हे खत।
सिलाचःर्हे कुन्हु थीथी थासय् लँ पनाः जगाः कायेगु नं चलन दु। अले त्वाःत्वालय् वनाः सिँ फ्वं वनेगु नं चलन दु। बहनी वहे सिँ च्याकाः मि कुनेगु व जगाःपाखें वःगु दामं कःनिमुस्या सियाः सकस्यां इनाः नयेगु चलन दु ।
महाद्यःया नं आपालं तिरिमय्जुपिं दु। शिव पुराण व स्वस्थानी बाखनय् न्ह्यथनातः कथं महाद्यवं वृद्ध भेषय् सतिदेवीलिसे इहिपा याःगु खःसा तरुण भेषय् पार्वतीलिसे, ब्राह्मण भेषय् गोमय्जुलिसे इहिपा याःगु उकिं महाद्यःया लीला कथं फ्वगिं, तरुण, बृद्ध आदि अवतारया रुप क्यनातःगु दु। थीथी मिस्तलिसे स्वापू दुगु ल्याखं महाद्यःया नां काइबलय् थीथी मिसापिंलिसे स्वानाः नं कायेगु याः गथे कि शिव-पार्वती, गौरी-शंकर, उमा-महेश्वर आदि। उकथं हे निम्ह तिरिपाखें महाद्यःया निम्ह हे मस्त दु - गौरीपुत्र गणेश व गंगापुत्र कुमार ।
शिवरात्रि कुन्हु महाद्यःया थज्याःगु थीथी रुप व बाखं लुमंकाः वसपोलयात हनेगु ज्या जुयाच्वनी। त्वाःत्वाःपतिं गन गन महाद्यः दु अन अन चछि न्हिछिं हे महाद्यःया पुजा जुइसा नेवाः समाजय् दिक्षा दुपिनि सिलाचःर्हे कुन्हु थःगु हे पुजा नं न्ह्यानाच्वनी ।
लव कर्माचार्य
