छम्ह पत्रकार स्यात, मेम्हेसित आक्रमण
जनकपुरय् हानं मेम्ह पत्रकारया हत्या जूगु दु । वंगु चान्हय् छथ्वः अज्ञात पुचलं स्थानीय रेडियो पत्रकार उमा सिंहयात विभत्स रुपं स्याना बिउगु खः । जनकपुर १४ वडाया रजौलय् डेराय् च्वनाच्वंम्ह पत्रकार सिंहयात करिब झिंन्याम्हेसिया छगू पुचः क्वथाय् हे दुहां वयाः लाथेपाथे खुकुरीं पालाः घाःपाः याना बिउगु खःसा घाःपाः जूम्ह सिंह येँय् हयाच्वँच्वं हे मदुगु खः ।
'रेडियो टुडे'य् ज्या यानाच्वंम्ह पत्रकार सिंह तराई लागाय् प्रचलित क्वसः (दाइजो) प्रथाया विरोधय् कलम संका वयाच्वंम्ह खः ।
वय्कः सिराहाय् नं थज्याःगु हे विषय ज्वनाः पत्रकारिता यानाच्वंम्ह खःसा अन नं थीथी कथंया ख्याच्वः वयेवं विस्थापित जुयाः जनकपुरय् च्वं वयाच्वंम्ह खः ।
जनकपुरय् हे म्हिगः मेम्ह पत्रकार मोनिका झायात नं आक्रमणया कुतः याःगु दु । आक्रमणकारीतय्सं 'उमा सिंहया पाः सिधल आः छंगु पाः' धकाः झाया छेँया झ्याः व लुखा स्यंकेगु कुतः याःगु खः । पत्रकार सिंहया हत्या व झायात जूगु आक्रमणयात कयाः थौं नेपाल पत्रकार महासंघया आकस्मिक बैठक च्वनेत्यंगु दु । संघं निगुलिं घटनाया विरोध यायेधुंकूगु दु ।
