वायुसेवा कर्मचारीं लेखा विरुद्ध मुद्दा तइगु
येँ (सन्ध्या टाइम्स)/नेपाल वायुसेवा निगमं न्यायेगु धकाः ठिक्क यानातःगु विमान न्याये दइ मखु धकाः पना बिउगुलिं नेपाल वायुसेवा निगमया कर्मचारीतय्सं लेखा समिति विरुद्ध मुद्दा तइगु जूगु दु। निगमं विमान न्यायेगु धकाः बैना समेत बिया छ्वयेधुंकाः सार्वजनिक लेखा समितिं थ्व ज्या दिकि धकाः पना बिउगु खः। लेखाया थ्व निर्देशनं यानाः निगमं विमान न्याये मखंगु व विमान मदुगु कारणं निगम झन् हे धरासायी जुइगु खतरापाखे वंगु धासें निगमया कर्मचारी युनियनं थ्व मुद्दा तयेत्यंगु खः ।
निगम सूत्रं बिउगु जानकारी कथं अनया कर्मचारी युनियनं लेखाया थ्व ज्या छगू स्वायत्त निकायया आन्तरिक ज्याय् जू वंगु हस्तक्षेप खः धासें उकिया विरुद्ध मुद्दा तयेत्यंगु खः। उकियात कयाः थौंकन्हय् अनया कर्मचारी युनियन दथुइ सहलह जुयाच्वंगु दु। थज्याःगु मामिलय् निगम स्वयमं कानुनी लँपु माले मछिंसां कर्मचारी युनियनपाखें मुद्दा तयेछिं धइगु खँ वःगुलिं कर्मचारीत थ्व लँपुइ वंगु खँ नं सूत्रं धाःगु दु।
नेपाल वायुसेवा निगमं थःपिनि लागिं निगः विमान न्यायेगु धकाः बैना नापं बिया छ्वयेधुंकूगु दु। तर सार्वजनिक लेखा समितिं विमान न्यायेगु ज्याय् अनियमितता जूगु खनेदु धासें आःयात विमान न्यायेगु ज्या रोके या धकाः निर्देशन बिउगु खः। निगम सूत्रं धाःसा लेखा समितिं विमान न्यायेगु थ्व ज्या रोके या धकाः निर्देशन बिउगुया लिउने नं छुं कथंया गिरोहया ल्हाः दयेमाः धकाः शंका प्वंकूगु दु ।
उखे निगमया लागिं विमान न्यायेम्वाः धकाः हाला जूम्ह निगमया मैनेजिङ्ग डाइरेक्टर क्याप्टेन लिम्बु विरुद्ध नं कर्मचारी व पाइलटतय्सं आन्दोलन यायेगु तयारी यानाच्वंगु खँ धाःगु दु। सर्वोच्चय् लानाच्वंगु लिम्बुया कार्यकारिणी अधिकार सम्बन्धी मुद्दाय् छुं जुयाः वय्कः त्यात धाःसा पाइलटं हडताल याइगु खँ दु ।
